बैशाख २१ धनगढी । सुदूरपश्चिम प्रदेशका मुख्यमन्त्री कमलबहादुर शाहले प्रदेश सरकार शैक्षिक गुणस्तर सुधारसँगै बेरोजगारी समस्या समाधानतर्फ केन्द्रित रहेको बताएका छन् । सोमबार कैलालीको बर्दगोरिया कलेजको शैक्षिक तथा प्रशासनिक भवन शिलान्यास पछि सम्बोधन गर्दै उनले यस्तो बताएका हुन ।
सीमित स्रोत साधनका बाबजुद पनि गुणस्तरीय शिक्षालाई प्रदेश सरकारले प्राथमिकता दिएको बताउदै मुख्यमन्त्री शाहले हाल आधा किलोमिटरको दूरीभित्र करिब ९० प्रतिशत बालबालिका शिक्षाको पहुँचमा पुगेको जानकारी गराए । बाँकी १० प्रतिशतलाई पनि सडक सञ्जालसँग जोडेर विद्यालय पहुँच विस्तार गरिने उनले बताए ।
कलेज भवन निर्माणका लागि प्रदेश सरकारले आर्थिक वर्ष २०८२÷८३ मा १० करोड रुपैयाँ विनियोजन गरेको छ । कार्यक्रममा सामाजिक विकास मन्त्री मेघराज खड्का, वर्दगोरिया गाउँपालिकाका अध्यक्ष कर्ण कुँवर, पञ्चदेवल विनायक नगरपालिकाका नगरप्रमुख अम्बिका चलाउने तथा सामाजिक विकास सचिव डा. हेमराज रेग्मी लगायतको उपस्थिति रहेको थियो ।
