बैशाख २१ धनगढी । सुदूरपश्चिम प्रदेशका विभिन्न जिल्लामा आएको हावाहुरीले विद्यालय, घर, पसल तथा विद्युत संरचनामा ठूलो क्षति पु¥याएको छ । विशेषगरी बैतडी जिल्लामा सोमबार दिउँसो पानीसँगै आएको हावाहुरीले ठूलो क्षति पु¥याएको हो ।
दोगडाकेदार गाउँपालिका वडा नम्बर–३ कपडास्थित जसलिङ्ग आधारभूत विद्यालयको जस्तापाताले छाएको छानो उड्दा शैक्षिक सामग्रीमा क्षति पुगेको छ भने पठन पाठन प्रभावित हुने देखिएको छ । त्यसैगरी सिगास गाउँपालिका वडा नम्बर–१ मा पसल, पाटन नगरपालिका वडा नम्बर–७ मा घर तथा गोठ, र मेलौली नगरपालिका वडा नम्बर–९ मा नेपाल टेलिकमको टावरमा समेत क्षति पुगेको छ ।
मेलौली नगरपालिका वडा नम्बर–२ सलेनामा घर तथा पसलका छाना उड्नुका साथै धर्मघर माध्यमिक विद्यालयमा पनि क्षति भएको छ । शिवनाथ गाउँपालिका वडा नम्बर–१ कुस्मौतघाट स्थित सशस्त्र प्रहरीको बिओपी भवनको ब्यारेकको छानो समेत हावाहुरीले उडाएको छ ।
पाटन नगरपालिका वडा नम्बर–९ स्थित सिद्धेश्वर माध्यमिक विद्यालयको छात्रावास भवनमा ठूलो क्षति पुगेपछि विद्यार्थीहरूको आवास व्यवस्थापन चुनौतीपूर्ण बनेको छ । विद्यालय व्यवस्थापन समितिले सहयोगका लागि अपिल गरेको छ । हावाहुरीकै कारण विद्युत संरचनामा क्षति पुग्दा बैतडीमा विद्युत सेवा अवरुद्ध भएको छ ।
नेपाल विद्युत प्राधिकरण का अनुसार डडेल्धुरा र बलाँच क्षेत्रको ३३ केभी प्रसारण लाइनमा क्षति पुगेपछि सेवा प्रभावित बनेको हो । हाल मर्मत कार्य जारी रहेको बताईएको छ । त्यसैगरी कञ्चनपुर जिल्ला मा आइतबार आएको हावाहुरीले ३७ भन्दा बढी विद्युतीय पोलमा क्षति पु¥याएको छ ।
कृष्णपुर, बेदकोट र भीमदत्त नगरपालिकामा विद्युत सेवा अवरुद्ध भएको छ । जनशक्ति अभावका कारण मर्मत कार्यमा केही ढिलाइ भइरहेको जनाइएको छ । मौसम पूर्वानुमान अनुसार आगामी तीन दिनसम्म मौसम सामान्य रहने अपेक्षा गरिएको छ ।
