फागुन ०४ कञ्चनपुर । आसन्न निर्वाचनको सुरक्षा संवेदनशीलतालाई मध्यनजर गर्दै सुदूरपश्चिम प्रदेशका सात वटा जिल्ला कारागारको सुरक्षाका लागी नेपाली सेनालाई खटाईएको छ । पहाडी जिल्ला बैतडी र बाजुरा बाहेक तराईको कैलाली र कञ्चनपुर जिल्ला कारगारसँगै सात वटा जिल्ला कारागारको सुरक्षाका लागी नेपाली सेनालाई खटाईएको हो ।
नेपाली सेनाको श्री नं २५ बाहिनी अड्डा भगतपुर ब्यारेक कञ्चनपुरका अनुसार वाहिनी अन्तर्गत रहेका कञ्चनपुर, डडेल्धुरा, दार्चुला र बझाङमा रहेका कारागारको सुरक्षामा सेना तैनाथ भइसकेको छ । बैतडीमा भने कारागार निर्माणाधीन अवस्थामा रहेकाले सेना खटिनु नपरेको जिल्ला प्रहरी कार्यालय बैतडीका प्रमुख प्रहरी नायब उपरीक्षक दीपककुमार रायले जानकारी गराएका छन ।
त्यसैगरी नेपाली सेनाको श्री नं ५ वाहिनी अड्डा अन्तर्गतका डोटी, कैलाली र अछाममा समेत कारागार सुरक्षार्थ सेना खटिएको छ । सुरक्षाका दृष्टिकोणले अति संवेदनशील मानिएका कारागार तथा महत्वपूर्ण आयोजनामा सेना परिचालन गर्ने मन्त्रिपरिषद्को निर्णय अनुरुप सेना खटिएको हो ।
सुदूरपश्चिम प्रदेश प्रहरी कार्यालयका प्रहरी उपरीक्षक सागर बोहराले सात वटा जिल्लाका कारागार, विनमास्थल सुरक्षा र धनगढीस्थित आयल निगमको डिपोमा सेनाले सुरक्षा दिइरहेको जानकारी गराएका छन ।
बैतडी र बाजुराको कारगार भवन निर्माणाधीन अबश्थामा रहेको बताउदै प्रहरी उपरीक्षक बोहराले गेटा विमानस्थल, बाजुराको कोल्टी विमानस्थल, डोटी र बझाङ विमानस्थलमा सुरक्षाका लागि सेना खटिइसकेको जानकारी गराए ।
’ त्यसैगरी, निर्वाचन सुरक्षालाई लक्षित गरी केही सातायता नेपाली सेना सुदूरपश्चिमभर खटिएको छ । सेनाको टोलीले विभिन्न निर्वाचन क्षेत्रमा गस्ती लगायत सुरक्षा प्रबन्ध गरिरहेको सेनाले जनाएको छ ।
