बैशाख ०९ डडेल्धुरा । जिल्ला सदरमुकाम डडेल्धुरामा करिब चार किलोमिटर सडक बजेट अभावमा अलपत्र परेको छ । सडक विस्तारका लागि सरकारले ६५ करोड रुपैयाँ मुआब्जा वितरण गरेको चार वर्ष पूरा भए पनि सडक विस्तार कार्य बजेट अभावमा अलपत्र परेको हो ।
आर्थिक वर्ष २०७७÷०७८ मा स्थानीयलाई मुआब्जा वितरण गरिएपछि सडक दायाँ–बायाँ १५–१५ मिटर भित्रका घर तथा संरचना हटाइएका थिए । केही व्यापारीहरूले मुआब्जा पाएको जग्गा प्रयोग गर्दै घर तथा पसल अगाडी सडकको भाग मासिक १० हजार रुपैयाँसम्म भाडामा लगाएर फलफूल र तरकारी बिक्री गर्दै आएको देखिएको छ ।
हाल पाँच मिटर चौडा कालोपत्रे भएको उक्त सडकलाई ३० मिटर चौडा बनाउने योजना भए पनि आवश्यक बजेट अभावका कारण काम अघि बढ्न नसकेको सडक डिभिजन कार्यालय कुलपाते, डोटीका कार्यालय प्रमुख रमेश भट्टराईले जानकारी गराए ।
कैलाली–दार्चुला जोड्ने महाकाली राजमार्ग अन्तर्गत अमरगढी नगरपालिका वडा नम्बर–५ बागबजारको पिपल चौतारा देखि वडा नम्बर ८ डकलेसम्म सडक विस्तारका लागि सरकारले मुआब्जा वितरण गरेको हो । पहिलो चरणमा २० करोड, दोस्रो चरणमा ३० करोड र बाँकी रकम तेस्रो चरणमा पठाइएको कार्यालय प्रमुख भट्टराईले जानकारी गराए ।
पहिलो चरणमा बागबजार देखि तुफान डाँडातर्फ करिब तीन सय मिटर क्षेत्रमा रहेका १ सय ६ घर तथा जग्गाधनीलाई मुआब्जा वितरण गरिएको उनले बताए । दोस्रो चरणमा २ सय ८४ जनालाई मुआब्जा दिइएको उनले बताए ।
सडक डिभिजन कार्यालय कुलपाते, डोटीले उक्त सडक विस्तारका लागि ९७ करोड रुपैयाँ बजेट विभागसँग माग गरेको बतउदै उनले माग गरिएको तीन वर्षपछि चालु आर्थिक वर्ष २०८२÷८३ मा २० करोड रुपैयाँ ‘रातो किताब’मा समावेश भए पनि भदौमा भएको जेनजी आन्दोलन पछि बनेको सरकारले उक्त रकम रोक्का गरेको जानकारी गराए ।
रकम अभावका कारण हालसम्म सडक विस्तारको काम अघि बढ्न नसकेको उनले बताए । सुदूरपश्चिमका सात वटा पहाडी जिल्लाको ट्रान्जिट प्वाइन्टका रूपमा रहेको डडेल्धुरामा साँघुरो सडकका कारण आवत जावतमा समस्या भइरहेको छ । सडक कालोपत्रे भएको २६ वर्षपछि स्तरोन्नतिको योजना अघि बढे पनि बजेट अभावले काम रोकीदा स्थानीय निराश बनेका छन् ।
२०३५ सालमा पहिलो पटक डडेल्धुरामा गाडी पुगेको थियो भने बजार क्षेत्रको सडक २०५४ सालमा कालोपत्रे सुरु भई २०५७ सालमा सम्पन्न भएको थियो । सडक विस्तारमा ढिलाइ हुनुको मुख्य कारण बजेट अभाव र बहुवर्षीय स्रोत सहमति नहुनु रहेको सडक डिभिजन कार्यालय डोटीका सूचना अधिकारी उदय कठायतले जानकारी गराएका छन ।
अहिले बजेट व्यवस्थापनका लागि विभागमा प्रस्ताव पठाइएको बताउदै उनले ८० करोड रुपैयाँको बहुवर्षीय योजना स्वीकृत गराउने प्रक्रिया अघि बढाइएको बताए । आर्थिक वर्ष २०८३÷८४ मा बजेट सुनिश्चित भएपछि ठेक्का प्रक्रिया अघि बढाई सडक विस्तारको काम सुरु गरिने तयारी रहेको उनले बताए ।
