बैशाख ०९ धनगढी । कैलालीका स्थानीय पालिकाहरूले गहुँ काटीसकेपछि खेतबारीमा आगो नलगाउन स्थानीय नागरिकलाई अनुरोध गरेका छन् । किसानले गहुँ बाली भित्र्याइसके पछि खेतबारीमा आगो लगाउने कार्यले विपत निम्त्याउन सक्ने भएकाले पालिकाहरूले खेतबारीमा आगो नलगाउन स्थानीय नागरिकलाई अनुरोध गरेका । खेतबारीमा आगो लगाउँदा माटो सुरक्षामा असर पर्ने, वातावरण प्रदूषित हुनुका साथै बस्तीमा आगलागीको जोखिम बढ्ने भएकाले आगो नलगाउन पालीकाहरुले सूचना मार्फत आग्ह गरेका हुन ।

सुदूरपश्चिम प्रदेशको कैलाली र कञ्चनपुरमा किसानले गहुँ भित्र्याउने काम सकेका छन । खेतबारीमा रहेको गहुँको नलमा किसानले आगो लगाउँदा जन धनको क्षतिका घटना हुने भएकाले सचेत हुन कैलालीको जानकी गाउँपालिकाले आग्रह गरेको   छ । गाउँपालिकाले गहुँ बाली भित्र्याउने क्रममा निस्किएको नल÷भुसा खेतमा नजलाई गौशालामा रहेका गाईवस्तुको आहाराका लागि निःशुल्क उपलब्ध गराइदिन अनुरोध गरेको विपद् सम्पर्क व्यक्ति नेत्रप्रसाद जैसीले जानकारी गराएका छन ।

टीकापुर नगरपालिका वडा नम्बर–२ मा रहेको गौशालामा जानकी गाउँपालिका र टीकापुर नगरपालिका क्षेत्रका छाडा गाई गोरु राख्ने गरिएको छ । गौशालामा रहेका गाई गोरुलाई आहारा अभाव भएका बेला किसानले खेतबारीमा आगो लगाएर आहारा नष्ट गर्नुभन्दा पशुलाई उपलब्ध गराउनु असल कर्म हुने जानकी गाउँपालीका वडा नम्बर–४ का रतन धामीले बताए ।

त्यसैगरी जोशीपुर गाउँपालिकाले खेतमा आगो लगाउँदा मानव बस्तीमा आगलागीजन्य घटना बढेकाले आगो नलगाउन आह्वान गरेको छ । गाउँपालिकाका कृषि अधिकृत सञ्जय चौधरीले आगो लगाउँदा सुक्ष्म जीवहरू मर्न गई माटोको उर्वराशक्ति ह्रास हुने बताउदै माटोको भौतिक, जैविक र रासायनिक गुण बिग्रने बताए । वातावरण प्रदूषण हुने, पशु आहारामा कमी हुने बताउदै उनले भुस्सा सङ्कलन गरी पालिकाले सञ्चालन गरेको गौशालामा बिक्री गरी सघाउन अनुरोध गरेको बताए ।

पालिकाले गहुँको भुस्साको मूल्य तोकेर बिक्री गर्ने किसानलाई पालिकामा आवेदन दिन सूचना गरेको जानकारी गराउदै उनले पालिकाले किसानको भुस्सा पशुको आहाराका लागि खरिद गर्ने बताए । पालिकाले तोकेको मूल्य अनुसार प्रतिट्रली भुस्सा तीन हजार ७ सय, प्रतिडनलप दुई हजार ५ सय तोकेको उनले जानकारी गराए ।

किसानको भुस्सा पालिकाले खरिद गर्ने बताउदै उनले बिक्री गर्ने किसानले पालीकाको वडा नम्बर–३ बञ्जरियामा रहेको काञ्जी हाउसमा पुर्याउनु पर्ने बताए । त्यसैगरी टीकापुर नगरपालिकाले पनि खेतबारीम आगो नलगाउन आग्रह गरेको छ । वन वातावरण तथा विपद् व्यवस्थापन शाखाकी प्रमुख निर्मला चौधरीले गहुँ बारीमा लगाएको आगाले खतरा उत्पन्न गरेको यस अघिका घटनाले देखाएकाले पछिल्ला केही वर्षयता आगो नलगाउन सचेत गराउने गरेको बताइन् ।

आगो लगाउँदा कहिलेकाहीँ घर तथा बस्तीमा आगलागी हुन सक्ने बताउदै उनले पालीकासंग एकमात्र दमकल भएको र प्रयाप्त जनशक्ति पनि नभएकाले खेतमा लगाएको आगो निभाउन समस्या हुने गरेको बताईन । सुदूरपश्चिम प्रदेशको भूमि व्यवस्था कृषि तथा सहकारी मन्त्रालयले समेत माटो सुरक्षाका लागि भए पनि खेतबारीमा आगो नलगाउन आग्रह गरेको छ ।

बाली विकास अधिकृत गिरिशराज जोशीले आगो लगाउँदा प्रदूषण बढ्नुका साथै माटोमा भएका मित्र कीराहरू पनि मर्ने भएकाले फाइदा नहुने बताए । खेतबारीमा आगो लगाउनुको सट्टा जोतेर पल्टाइ दिएमा गलेर मल बन्ने बताउदै उनले मलको समस्या टार्नका लागि बाँझो जमिनमा ढैचा खेती गरेर हरियो मलका रूपमा प्रयोग गर्न सकिने बताए ।

गत वर्षबाट किसानलाई सचेत गराएका कारण यस वर्ष अहिले सम्म टीकापुरमा तीनवटा मात्र आगलागीका घटना भएको विपद् व्यवस्थापन शाखाकी प्रमुख चौधरीले बताईन । गत वर्ष यो सिजनमा १२ वटा आगलागीका घटना भएको उनले बताईन । टीकापुरको दमकलले जानकी गाउँपालिका,जोशीपुर गाउँपालिका, भजनी नगरपालिका र बर्दियाको राजापुर नगरपालिका सम्म आगो निभाउने सेवा दिने गरेको जानकारी गराउदै उनले यस वर्ष भजनीमा दमकल ल्याएपछि केही राहत भएको

बताईन । गर्मीको समयमा मानिसहरुको सानो लाफरवाहीले ठुलो आगलागीका घटना हुन सक्ने भएकाले सबैले सचेत हुन उनले आग्रह गरिन ।