माघ २० धनगढी । सशस्त्र प्रहरी बलले सुदूरपश्चिम प्रदेशमा आगामी फागुन २१ गते हुने प्रतिनिधिसभा निर्वाचनलाई लक्षित गर्दै सबै निर्वाचन क्षेत्रमा बेस स्थापना गर्ने भएको छ । सुरक्षा योजना अनुसार प्रदेशका सबै निर्बाचन क्षेत्रमा सशस्त्र प्रहरीले स्थापना गर्ने भएको हो
सशस्त्र प्रहरी बल नेपाल नम्बर ७ बैद्यनाथ बाहिनीका निमित्त बाहिनीपति वरिष्ठ उपरीक्षक (एसएसपी) दिगविजय सुवेदीले प्रदेशका मुख्य निर्वाचन अधिकृत तथा निर्वाचन अधिकृतका कार्यालयमा सशस्त्र प्रहरी परिचालन गरिएको बताए । उनले माघ २१ गतेदेखि प्रदेशका सबै १६ वटै निर्वाचन क्षेत्रमा सशस्त्र प्रहरीको निर्वाचन क्षेत्र सुरक्षा बेस स्थापना गर्ने तयारी भइरहेको जानकारी गराए ।
उक्त सुरक्षा बेस डीएसपीको कमाण्डमा रहने जानकारी गराउदै उनले फागुन ६ गतेदेखि सशस्त्र प्रहरीको मोबाइल टोली परिचालन गरिने बताए । एसएसपी सुवेदीले रिजर्भ र क्यूआरटी टोलीलाई पनि तयारी अवस्थामा राखिने बताए ।
बाहिनीस्तरमा प्रदेशस्तरीय रिजर्भ तथा अनुगमन टोली गठन गरिएको जानकारी गराउदै उनले निर्वाचन अवधिभर प्रदेशभरी पाँच हजार एक सय जना सशस्त्र प्रहरी परिचालन गर्ने तयारी गरिएको बताए ।
सुदूरपश्चिम प्रदेशमा कुल एक हजार १ सय ७६ वटा मतदानस्थल र दुई हजार १ सय ९९ मतदान केन्द्र रहेका छन् । तीमध्ये ४ सय ८१ मतदानस्थल र ९ सय ८५ मतदान केन्द्र अतिसंवेदनशील सूचीमा राखिएका छन ।
त्यसैगरी ३ सय मतदानस्थल सामान्य र ३ सय ९५ संवेदनशील सुचिमा राखिएका छन भने मतदान केन्द्रतर्फ ४ सय ५६ सामान्य र ७ सय ५७ संवेदनशील सुचीमा राखिएका छन ।
