माघ १५ धनगढी । आगामी फागुन २१ गते हुने प्रतिनिधि सभा निर्वाचनमा कैलाली निर्वाचन क्षेत्र नम्बर ५ मा नयाँ अनुहारहरू बीच प्रतिस्पर्धा हुने भएको छ । नेपाली कांग्रेसका उम्मेदवार नरनारायण शाह, एमालेका यज्ञ ढुंगाना, नेकपाका प्रेम आले र रास्वपाका आनन्द बहादुर चन्द चारै जना नयाँ अनुहारहरू बीच प्रतिस्पर्धा हुने भएको हो ।
यसअघि कांग्रेस नेतृ डाः आरजु राणा देउवाले निर्वाचन लडेर पराजय भोगेको क्षेत्र नम्बर५ मा यसपटक पनि उनको उम्मेदवारीको चर्चा चलेको थियो । कांग्रेसले जिल्लाबाट आरजुसहित तीन जनाको नाम सिफारिस गरेको भए पनि कांग्रेसमा विशेष महाधिवेशनबाट नेतृत्व परिवर्तन भएपछि आरजुले टिकट नपाएर कांग्रेस प्रदेश महामन्त्री नरनारायण शाहले टिकट पाएका हुन ।
शाह पहिलो पटक निर्वाचनमा उँम्मेदार भएका छन । त्यसैगरी नेकपा एमालेबाट जिल्ला अध्यक्ष यज्ञ ढुंगाना चुनावी प्रतिस्पर्धामा रहेका छन् । ढुंगाना पनि पहिलो पटक चुनावी उम्मेदार बनेका हुन । यसअघि दुई पटक यस क्षेत्रबाट चुनाव लडेका एमाले नेता नारदमुनी रानाले यसपटक टिकट नपाए पछि ढुंगानाले टिकट पाएका हुन ।
रानाले २०७४ सालको निर्वाचनमा कांग्रेसकी नेतृ आरजु देउवालाई झण्डै पाँच हजार मतान्तरले पराजित गरेका थिए । त्यसपछि राना २०७९ को निर्वाचनमा कांग्रेसका डिल्लीराज पन्तसँग एक हजार मतान्तरले पराजित भएका थिए । त्यसैगरी नेकपाबाट पनि यस क्षेत्रका लागि नयाँ अनुहार प्रेम आले चुनावी प्रतिस्पर्धामा रहेका छन ।
डोटीबाट पटक–पटक निर्वाचन लडेर मन्त्री समेत बनेका आले कैलाली क्षेत्र नम्बर ५ का लागि नयाँ अनुहार हुन् । रास्वपाबाट आनन्दबहादुर चन्द चुनावी प्रतिस्पर्धामा छन् । चन्द पनि यस क्षेत्रका लागि एकदमै नयाँ अनुहार हुन् । यस क्षेत्रमा कांग्रेसको संगठन बलियो रहेको बताइए पनि निर्वाचनको परिणाम भने फरक – फरक आउने गरेको छ ।
२०४८ साल देखि २०७९ सम्म हेर्दा चार पटक कांग्रेसका उम्मेदवार विजयी हुँदा दुई पटक एमाले र एक पटक तत्कालीन माओवादीले चुनाव जितेको इतिहास छ । यसै निर्वाचन क्षेत्रमा कांग्रेसका निवर्तमान सभापति शेरबहादुर देउवाले समेत २०७० मा निर्वाचन जितेका थिए ।
अहिले कांग्रेसले कैलाली जिल्लाको दुई पटक सभापति भइसकेका प्रदेश महामन्त्री नरनारायण शाहलाई उम्मेदवार बनाए पछि उनका पक्षमा सबै कांग्रेसी एकजुट भएर खटिएको कांग्रेस कैलालीका सचिव नृप सुनारले बताएका छन । उनले सबैले रुचाएका उम्मेदवार कांग्रेसले अघि सारेका कारण र संगठन पनि बलियो रहेकाले कांग्रेसको जित सुनिश्चित भएको बताए ।
शाह राजनीतिसँगै यस क्षेत्रमा लामो समय देखि विभिन्न सामाजिक संस्थामा सक्रिय छन् । खासगरी उनलाई सबैले मिलनसार, सहयोगी र निष्कलंक नेताका रूपमा चिन्ने गरेका छन । एमालेका उम्मेद्वार यज्ञ ढुंगाना पनि युवा तथा विभिन्न सामाजिक कार्यमा सक्रिय रहेका कारण जितको सम्भावना रहेको एमाले पक्षको दाबी छ ।
यस क्षेत्रका एमाले नेता धर्म पाठकले एमालेको संगठन चुस्तदुरुस्त रहेको र सबै एकजुट भएकाले यसपटक एमालेले जित्ने दाबी गरेका छन । कांग्रेस र एमालेको तुलनामा नेकपाको संगठन कमजोर रहे पनि चुनावी मैदानमा रहेका प्रेम आलेले व्यक्तिगत रूपमा धेरै मत आकर्षित गर्न सक्ने नेकपाका नेताहरूले बताएका छन ।
नेकपाका नेता तथा यसै निर्वाचन क्षेत्रको प्रदेश सभा क बाट निर्वाचित सदस्य रमेश धामीले नेकपाको देशभरको लहर र उम्मेदवारको व्यक्तिगत छविका कारण नेकपा पनि कडा प्रतिस्पर्धामा रहेको बताए । रास्वपाको बाहिर संगठन नदेखिए पनि शहरी क्षेत्र भएका कारण भित्र भित्रै आफ्ना मतदाता रहेको रास्वपाका नेता हरि रेग्मीले बताए ।
उनले शहरी क्षेत्र परिवर्तनको पक्षमा हुने हुँदा कैलाली ५ मा पनि यसपटक मत परिवर्तन हुने बताए । हाल सुदूरपश्चिमको अस्थायी राजधानी समेत रहेको यस निर्वाचन क्षेत्रमा सुदूरपश्चिमका सात वटा पहाडी जिल्लाका बासिन्दाको बाहुल्यता रहे पनि देशभरका सबै जिल्लाका नागरिकको पनि बसोबास रहेको छ ।
यस निर्वाचन क्षेत्रमा धनगढी उपमहानगरपालिकाका १९ वटा वडा र कैलारी गाउँपालिकाका दुई वटा वडा रहेका छन । यसअघिको स्थानीय निर्वाचनमा धनगढी उपमहानगरपालिकाको मेयरमा स्वतन्त्र उम्मेदवार गोपाल हमाल निर्वाचित भएका थिए । १९ वडा मध्ये १२ वटा वडा कांग्रेसले जिते पनि मेयर भने गुमाएको थियो । उपमेयर सहित पाँच वटा वडा एमालेले जितेको थियो । तत्कालीन माओवादी केन्द्रले दुई वटा वडा मात्रै जितेको थियो ।
