माघ १४ धनगढी । सुरक्षाका दृष्टिकोणले सुदूरपश्चिम प्रदेशका ४ सय ८१ वटा मतदानस्थललाई अतिसंवेदनशील सूचिमा राखिएको छ । आसन्न फागुन २१ गते हुने प्रतिनिधिसभा सदस्य निर्वाचनलाई मध्यनजर गर्दै सुदूरपश्चिम प्रहरीले १६ वटा निर्वाचन क्षेत्रका ४ सय ८१ वटा मतदानस्थललाई अतिसंवेदनशील सूचिमा राखेको हो ।
मतदानस्थललाई सामान्य, संवेदनशील र अतिसंवेदनशील गरी तीन भागमा वर्गीकरण गरिएको छ । नौ वटा जिल्ला रहेको सुदूरपश्चिम प्रदेशमा तराईका साथै कैलालीमा पाँच र कञ्चनपुरमा तीन गरी आठ वटा निर्वाचन क्षेत्र छन् भने बाँकी आठ वटा निर्वाचन क्षेत्र सुदूरपश्चिमका सात वटा पहाडी जिल्लामा रहेका छन् ।
पहाडी जिल्ला अछाममा दुई वटा र्बिाचन क्षेत्र छन् भने बाँकी छ वटा पहाडी जिल्लामा एक÷एक निर्वाचन क्षेत्र रहेका छन । सुदूरपश्चिम प्रदेश प्रहरी कार्यालय धनगढीले निर्वाचन लक्षित सुरक्षा रणनीति बनाएर सुरक्षा निकाय सक्रियताका साथ अघि बढेको जानकारी गराएको छ । प्रदेशमा प्रदेशस्तर र जिल्लामा जिल्ला तहका सुरक्षा समितिहरुले काम गरिरहेको बताईएको छ ।
एक हजार १ सय ७६ वटा मतदानस्थल रहेको सुदूरपश्चिम प्रदेशमा ३ सय वटा सामान्य, ३ सय ९५ वटा संवेदनशील र ४ सय ८१ अतिसंवेदनशील मतदानस्थलको रुपमा बर्गीकरण गरिएको छ भने दुई हजार १ सय ९९ मतदान केन्द्र रहेका छन् । सुदूरपश्चिम प्रदेशमा सबैभन्दा बढी कैलालीमा मतदानस्थल अतिसंवेदनशील मानिएका छन ।
सुदूरपश्चिमको ठूलो जिल्ला कैलालीमा १ सय ८ वटा मदानस्थल अतिसंवेदनशील मानिएको जिल्ला प्रहरी कार्यालय कैलालीका प्रमुख प्रहरी उपरीक्षक नरेन्द्र चन्दले जानकारी गराए । अतिसंवेदनशीन मतदानस्थलमा सोही अनुसार सुरक्षा प्रबन्ध बढाइने जानकारी गराउदै उनले जिल्लाका सबै निर्वाचन क्षेत्रको सुरक्षामा योजना सहित अघि बढेको जानकारी गराए ।
त्यसैगरी कञ्चनपुरका १ सय ३२ वटा मतदानस्थल मध्ये ६६ वटा स्थललाई अति संवेदनशीलको सूचीमा राखिएको जिल्ला प्रहरी कार्यालय कञ्चनपुरले जनाएको छ । कूल ७७ वटा मतदानस्थल रहेको सुदूरपश्चिमको पहाडी जिल्ला बाजुरामा ६२ वटा मतदानस्थल अतिसंवेदनशील स्थलको सूचीमा राखिएको छ ।
सुदूरपश्चिम प्रदेशमा नेपाल प्रहरी, सशस्त्र प्रहरी, निर्वाचन प्रहरी र सुरक्षाको बाहिरी घेरामा नेपाली सेना परिचालन गरिने बताइृएको छ । नेपाल प्रहरी मात्रै सात हजार भन्दा बढी परिचालन हुने प्रदेश प्रहरी कार्यालय धनगढीले जानकारी गराएको छ । स्वतन्त्र र राजनीतिक दलका गरी १६ वटा प्रतिनिधिसभा सदस्यका लागि २ सय ६ जना उम्मेदवार चुनावी मैदानमा उत्रिएका छन् ।
