माघ ०४ धनगढी । फागुन २१ गते हुने प्रतिनिधि सभा सदस्यको निर्वाचनका लागि नेपाली कम्युनिस्ट पार्टी (नेकपा) ले सुदूरपश्चिम प्रदेशका १६ वटा निर्वाचन क्षेत्रमा उम्मेदवारको नाम टुंगो लगाएको छ । पार्टीले १६ वटा निर्वाचन क्षेत्रमा उम्मेदवारको नाम टुंगो लगाएको हो ।
अछाम क्षेत्र नम्बर–१ बाट भीम रावलको नाम सिफरिस गरिएको छ भने कैलाली क्षेत्र नम्बर–१ बाट साविक नागरिक उन्मुक्ति पार्टीका नेता र हाल टिकापुर नगरपालिकाका नगर प्रमुख रामलाल डगौरा थारुलाई उम्मेदवार बनाइएको छ । कैलाली क्षेत्र नम्बर–२ बाट राजेन्द्र साउँद, ३ बाट विरमान चौधरी र ४ बाट हरि चौधरी उत्सवको उम्मेदवारी तय गरिएको छ ।
साउँद र चौधरीहरू साविक माओवादी पृष्ठभूमिका नेता हुन् । पूर्वमन्त्री तथा साविक नेकपा एकीकृत समाजवादी नेता प्रेमबहादुर आलेमगरले कैलाली क्षेत्र नम्बर–५ बाट उम्मेदवारी दिने भएका छन । उनले राष्ट्रिय स्वतन्त्र पार्टीबाट चुनाव लड्ने चर्चा चलेको भए पनि अन्ततः नेकपाबाटै चुनाव लड्ने निर्णय गरेका छन् ।
त्यसैगरी कञ्चनपुर क्षे नम्बर–१ मा विना मगर, २ मा लाल बहादुर खड्का र ३ मा मान बहादुर सुनारको नाम सिफरिस गरिएको छ । अछाम क्षेत्र नम्बर–२ बाट माओवादी पृष्ठभूमिका शरदसिंह भण्डारीले चुनाव लड्ने भएका छन ।
डडेल्धुराबाट मानसिंह माल, दार्चुलाबाट लक्ष्मणदत्त जोशी, बझाङबाट मीनबहादुर कुवर, बैतडीबाट परमानन्द भट्ट र डोटीबाट त्रिलोचन भट्टले चुनाव लड्ने भएका छन । प्रस्तावित उम्मेदवारहरूमा साविक नेकपा माओवादी केन्द्रबाट १० जना, नेकपा एकीकृत समाजवादीबाट तीन जना, नागरिक उन्मुक्ति पार्टीबाट एक जना र मातृभूमि जागरण अभियानबाट एक जना रहेका छन् । बाँकी उम्मेदवार एमाले छाडेर नेकपा प्रवेश गरेका पूर्व नेताहरू हुन् ।
