पौष २७ डडेल्धुरा । संघीय सरकार मातहत रहेको डडेल्धुरा अस्पतालले स्थानीय नागरिकलाई लक्षित गरी जटिल प्रकृतिका हाडजोर्नी सम्बन्धी शल्यक्रिया सर्वसुलभ र गुणस्तरीय रूपमा प्रदान गर्न थालेको छ । अस्पतालले जटिल हाडजोर्नी शल्यक्रिया सर्वसुलभ र गुणस्तरीय रूपमा प्रदान गर्न थालेको हो ।
अस्पतालमा जटिल हाडजोनी शल्यक्रिया सफलतापूर्वक सम्पन्न भएका छन् । जसले गर्दा बाहिरका ठूला सहरमा उपचारका लागि जाँदा बिरामी र परिवारले व्यहोर्नुपर्ने झन्झट र ठूलो खर्च पनि जोगिने भएको छ । अमरगढी नगरपालिका पवडा नम्बर–७ का ६५ वर्षीय पुरुषको तिघ्रा फेर्ने शल्यक्रिया सफलतापूर्वक गरिएको छ ।
त्यसैगरी, अमरगढी नगरपालिका वडा नम्बर–१० का ७० वर्षीय पुरुषमा देखिएको घुँडाको हड्डी भाँचिएको समस्याको शल्यक्रिया पनि सफलतापूर्वक सम्पन्न गरिएको छ । डडेल्धुरा बाहिरका बिरामीले समेत अस्पतालबाट सेवा लिन थालेका छन् ।
बैतडीको शिवनाथ गाउँपालिका वडा नम्बर–३ की ६५ वर्षीया महिलाको घुँडासहित टिबिया र फिबुला हड्डी भाँचिएको जटिल अवस्थाको शल्यक्रिया सफल भएको अस्पतालले जनाएको छ । त्यसैगरी दार्चुलाको लेकम गाउँपालिका वडा नम्बर–६ की २७ वर्षीया महिलाको पनि शल्यक्रिया गरिएको छ ।
अस्पतालका अनुसार पुस महिनाका २५ दिनमा जटिल प्रकृतिका ४० वटा शल्यक्रिया सम्पन्न भइसकेका छन् । तीमध्ये केही शल्यक्रिया सुदूरपश्चिम प्रदेशमै पहिलो पटक गरिएको दाबी अस्पतालले गरेको छ ।
डडेल्धुरा अस्पतालमा विशेषज्ञ सेवा उपलब्ध हुन थालेपछि बिरामीले उपचारका लागि अन्यन्त्र धाउनुपर्ने बाध्यता कम हुँदै गएको छ । डडेल्धुरा अस्पतालले आगामी दिनमा थप विशेषज्ञ सेवा विस्तार गर्दै गुणस्तरीय उपचारलाई निरन्तरता दिने तयारी गरेको जानकारी गराएको छ ।
