चैत्र ३० कञ्चनपुर । कञ्चनपुरमा चैते धानको खेती गर्ने किसानको सङ्ख्या घटेको छ । कृषि ज्ञान केन्द्र र प्रधानमन्त्री कृषि आधुनिकीकरण परियोजना कार्यालय कञ्चनपुरको तथ्याङ्क अनुसार चैते धान लगाउने कृषकको सङ्ख्या घटेको हो । केही वर्ष अघि सम्म कञ्चनपुर जिल्लामा ४ सय हेक्टरमा चैते धान खेती हुने गरेकोमा अहिले डेढ सय हेक्टरमा मात्रै खेती हुने गरेको कृषि ज्ञान केन्द्रका सहायक बाली विकास अधिकृत धर्मबहादुर साउँदले जानकारी गराए ।
किसानलाई विभिन्न किसिमका कृषि उपकरण र सिँचाइका लागि बोरिङ लगायत सुविधा उपलब्ध गराउने गरेको बताउदै उनले चैते धान खेतीका लागि धेरै सिँचाइ आवश्यक हुने भएकाले सिँचाइ सुविधा उपलब्ध नहुँदा चैते धान खेती घट्दै गएको बताए । कृषी ज्ञान केन्द्रबाट किसानलाई ५० प्रतिशत अनुदानमा सिँचाइका लागि बोरिङ उपलब्ध गराउँदै आएको भए पनि त्यसले पर्याप्त रुपमा सिँचाइ हुन नसकेको बताए ।
प्रधानमन्त्री कृषि आधुनिकीकरण परियोजना धान जोन कार्यालयले पनि कञ्चनपुरमा लक्ष्य अनुसारको धान खेती हुन नसकेको जनाएको छ । कञ्चनपुरमा कुल खेतीयोग्य जमिन एक लाख ६१ हजार ७ सय ४१ हेक्टर रहेको छ । जसमध्ये ५९ हजार ६ सय २ हेक्टर अर्थात् ३६ प्रतिशत जमिनमा खेती हुने गरेको छ । यसको २९ प्रतिशत क्षेत्रफलमा मात्रै सिँचाइ सुविधा उपलब्ध हुने गरेको छ । कञ्चनपुरमा ४८ हजार ६ सय हेक्टरमा धान खेती हुने गरेको छ ।
कञ्चनपुरमा हाल महाकाली सिँचाइ आयोजना पहिलो र दोस्रो चरणबाट ११ हजार ६ सय हेक्टर क्षेत्रफलमा सिँचाइ सुविधा उपलब्ध छ । विक्रम संवत् २०४२ मा सुरु भई ०४८ मा सम्पन्न भएको महाकाली सिँचाइ पहिलो चरणबाट चार हजार ८ सय हेक्टर र ०५२ मा सम्पन्न भएको दोस्रो चरणबाट ६ हजार ८ सय हेक्टर क्षेत्रमा सिँचाइ सुविधा पुगेको छ । पहिलो र दोस्रो चरणको सिँचाइबाट भीमदत्त नगरपालीका,बेदकोट नगरपालिका र बेलडाँडी गाउँपालिका सम्म सिँचाइ सुविधा उपलब्ध भमएको छ ।
