पौष १७ धनगढी । सुदूरपश्चिम प्रदेशमा पुरुष भन्दा महिला मतदाताको संख्या बढी रहेको छ । आगामी फागुन २१ गते हुने प्रतिनिधिसभा सदस्य निर्वाचनका लागि प्रदेशमा पुरुष भन्दा महिला मतदाताको संख्या बढी रहेको हो ।
निर्वाचन आयोगले अद्यावधिक गरेको मतदता मध्ये महिलाको संख्या ८ लाख ६४ हजार ४ सय २३ जना महिला र पुरुषको संख्या ८ लाख ५२ हजार २ सय १९ रहेको प्रदेश निर्वाचन कार्यालय धनगढीका सूचना अधिकारी राजेश चौधरीले जानकारी गराए । त्यसैगरी १८ जना अन्य मतदाता रहेको उनले जानकारी गराए ।
प्रतिनिधिसभा निर्वाचनका लागि प्रदेशमा १७ लाख १६ हजार छ सय ६० जना मतदाता कायम भएको उनले जानकारी गराए । विसं. २०७९ सालको निर्वाचनमा १६ लाख ६९ हजार ४ सय ११ जना मतदाता रहेका थिए । हाल प्रदेशमा ४७ हजार २ सय ४९ जना मतदाता थपिएको प्रदेश निर्वाचन कार्यालयले जनाएको छ ।
प्रदेश निर्वाचन कार्यालयका अनुसार कैलालीमा ५ लाख ५१ हजार ५२,कञ्चनपुरमा ३ लाख १४ हजार ३ सय ८५,अछाममा १ लाख ६५ हजार ३ सय ३७ र बैतडीमा १ लाख ५६ हजार ३ सय ७२ जना मतदाता रहेका छन् ।
त्यसैगरी डोटीमा १ लाख २८ हजार ३ सय ९९ बझाङमा,१ लाख २६ हजार ९ सय ३,दार्चुलामा ९२ हजार ९ सय ४८,डडेल्धुरामा ९३ हजार ४ सय ३,बाजुरामा ८७ हजार ८ सय ६१ मतदाता रहेको प्रदेश निर्वाचन कार्यालयले जनाएको छ । प्रदेशभरी १ हजार १ सय ७६ मतदान स्थल र २ हजार १ सय ९९ मतदान केन्द्र कायम रहेको जानकारी गराइएको छ ।
