पौष १२ धनगढी । कैलालीको घोडाघोडी तालको राजश्व उठाउने विषयमा विबाद भएको छ । विगतदेखि तालको संरक्षणमा काम गर्दै आएका सामुदायिक वन र सङ्घ संस्थासँग समन्वय नगरेका कारण नगरपालिकाले ठेक्का आह्वान गरेपछि तालको राजश्व उठाउने विषयमा विबाद भएको हो ।
घोडाघोडी तालको आम्दानीलाई एकद्वार प्रणालीमा ल्याउन नगरपालिकाले ठेक्का दिएको भए पनि ठेक्का पाएको कम्पनीले हालसम्म काम गर्न पाएको छैन । त्यसैकारण शुक्रबार घोडाघोडी ताल प्रवेशको मुख्य गेटमा निर्माण कम्पनीले ताला लगाएको थियो । उक्त ताला वन समूहले तोडेको छ । नगरपालिकाले १५ लाख रुपैयाँको ठेक्का आह्वान गरे पनि आफूहरूले बढीबढाउ ४१ लाख रुपैयाँको ठेक्का प्राप्त गरेको धनन्जय कठायतले बताएका छन् ।
उनले १५ लाख ४० हजार रुपैयाँ नगरपालिकामा जम्मा गरेको लामो समय हुँदा पनि काम गर्न नपाए पछि दबाब स्वरूप ताला लगाएको जानकारी गराए । राजस्व उठाउन ठेक्का दिएको कार्यप्रति घोडाघोडी संरक्षण तथा जनजागरण मञ्च लगायत वरपर जोडिएका सामुदायिक वनले विरोध जनाए पछि आफैँले गरेको निर्णय कार्यान्वयनमा ल्याउन नगरपालिकालाई समस्या भएको छ । समस्या सुल्झाउन वन, सरोकारवाला सङ्घसंस्था र पालिकाबिच पटक पटक छलफल भए पनि समस्याको समाधान हुन सकेको छैन ।
हाल मञ्चले शुल्क उठाउन छोडेपछि घोडाघोडी सामुदायिक वन समूहले प्रवेश शुल्क उठाउँदै आएको छ । वनका अध्यक्ष दीपक बहादुर शाहले बर्र्षौैदेखि सिमसार क्षेत्र संरक्षणमा जुटेको सामुदायिक वन उपभोक्ता समितिसँग कुनै छलफल र सहकार्य नगरेर स्थानीय सरकारले हस्तक्षेपकारी रूपमा ठेक्कामा लगाउनु गलत भएको बताए ।
ठेकेदारले लगाएको ताला वन समूहका सदस्यले तोडेको उनले बताए । स्थानीय उपभोक्ताले संरक्षण गर्दै आम्दानी लिन सुरु गरेको केही समयमै स्थानीय सरकारले हस्तक्षेप गरेपछि सामुदायिक वन उपभोक्ता समिति आक्रोशित बन्दै डिभिजन वन कार्यालय पहलमानपुरमा निवेदन समेत दिएको थियो ।
नगरप्रमुख खडकबहादुर रावतले गुरुयोजना निर्माण गर्दा सरोकारवाला सबैसँग समन्वय छलफल र सुझाव लिएको उल्लेख गर्दै नगरपालिकाले गुरुयोजना अनुसार नै घोडाघोडी ताल क्षेत्रको आम्दानीलाई एकद्वार प्रणालीमा ल्याउने कामका लागि ठेक्कामा दिने निर्णय गरेको बताएका छन ।
