लैङ्गिक हिंसा विरुद्धको १६ दिने अभियान सम्पन्न भएको छ । हरेक बर्ष नोभेम्बर २५ देखि डिसेम्बर १० तारिख सम्म आयोजना गरिएको लैङ्गिक हिंसा विरुद्धको १६ दिने अभियान यस बर्ष पनि सम्पन्न भएको हो । लैङ्गिक हिंसा विरुद्धको १६ दिने अभियान अभियानमै सिमित हुने गरेको छ ।
हरेक बर्ष अभियान मनाउने गरिएको भए पनि हिंसाको अन्त्य भने हुन सकेको छैन । घर–परिवार भित्र वा बाहिर महिलाह अहिले पनि असुरक्षित छन । हत्या, हिंसा र बलात्कार जस्ता घटनाहरुमा कमी आउन सकेको छैन । संयुक्त राष्ट्रसंघ, अन्तर्राष्ट्रिय तथा राष्ट्रिय संस्था र संयुक्त राष्ट्रसंघका सदस्य राष्ट्रहरूले यो अभियानलाई निरन्तरता दिँदै आएका भए पनि महिला हिंसाको अन्त्य हुन नसक्नु दुखद विषय हो ।
सन् १९९१ मा ‘वुमन्स ग्लोबल लिडरसिप इन्स्टिच्युट’ले सुरुआत गरेको यो अभियानले महिलामाथि हुने हिंसाविरुद्ध चेतना र प्रतिबद्धता बढाए पनि हिंसाको अन्त्य नहुनुले महिलाहरुले समस्या झेल्नु परेको अबश्था छ । नारीवादी आन्दोलनहरूले विश्वभर यसलाई अन्त्य गर्न निरन्तर प्रयास गरिरहे पनि घटना रोकिएका छैनन् । हिंसाका घटना निरन्तर भइरहेका छन् ।
पीडित तथा बाँचेकाहरूलाई संरक्षण र अपराधीलाई दण्डित गर्ने कानुन धेरै देशमा बनेका छन् तर हिंसा अन्त्य भएको छैन । बालविवाह र दाइजो सम्बन्धी हिंसाजस्ता हानिकारक चालचलनहरू आज पनि कायम छन । कानुनी रूपमा रोक लगाइए पनि यस्ता प्रथाहरूले महिलाहरुले समस्या भोग्दै आएका छन । बोक्सीको आरोप, बहुविवाह तथा समुदायस्तरमा हुने हिंसा अझै भईरहेका छन । महिला हिंसा न्यूनीकरणका लागि पुरुषहरु बढी जिम्मेवार हुन जरुरी छ ।
कानुन र नीति कागजमा सिमित नराखी कार्यान्वयन गरी मानसिकता बदल्न जरुरी छ । प्रत्येक महिलाहरुले हिंसा विरुद्ध आवाज उठाउन जरुरी छ । पुरुषहरुले पनि हिंसा गर्नु हुदैन भन्ने चेतनाको विकास गर्न आवश्यक छ । महिला हिंसाको अन्त्य गर्न महिला पुरुष एकजुट हुन जरुरी छ ।
