भदौ ३० काठमाण्डौ । बडादशैं आउन एक हप्ता मात्रै बाँकी रहदा पनि अझै अग्रीम टिकट बुकिङ खुलेको छैन । असोज ६ गते घटस्थापना भए पनि हालसम्म सार्वजनिक सवारीसाधनको अग्रिम टिकट बुकिङ नखुलेको हो ।
नयाँ सरकार गठनसँगै ‘जेनजी’ आन्दोलन पछि लगाइएको कफ्र्यु र निषेधाज्ञा हटेको छ भने जनजीवन सामान्य बन्दै गएको छ । लामो तथा छोटो दूरीका सार्वजनिक यातायात शुक्रबार देखि सञ्चालनमा आइसकेका भए पनि अग्रिम टिकट भने अझै खुलाइएको छैन । आन्दोलनकै कारण यसमा असर परेको सरोकारवालाहरूले बताएका छन ।
यसअघि यातायात व्यवसायी र सरकारबीच भदौ २९ गते देखि अग्रिम टिकट खोल्ने सहमति भएको थियो । तर, आन्दोलनले गर्दा प्रक्रिया अघि बढ्न सकेन । आन्दोलन रोकिए पछि भौतिक पूर्वाधार तथा यातायात मन्त्रालय र यातायात व्यवसायीबीच शनिबार भएको छलफलमा उच्चस्तरीय यातायात व्यवस्थापन समिति गठन भएको छ । तर अग्रिम टिकटबारे कुनै टुंगो लाग्न सकेको छैन ।
नेपाल यातायात व्यवसायी राष्ट्रिय महासंघका वरिष्ठ उपाध्यक्ष सरोज सिटौलाका अनुसार हाल काठमाडौं उपत्यकामा रोकिएका यात्रुलाई सुरक्षित रुपमा गन्तव्यमा पठाउने निर्णय भएको छ ।
पहिलो प्राथमिकतामा काठमाडौंमा अड्किएका यात्रुलाई पठाउने सहमति भएको बताउदै उनले अग्रिम टिकटबारे भने अझै निर्णय नभएको बताए । प्रकाशित तथ्यांक अनुसार, प्रत्येक वर्ष करिब २० लाख यात्रु दशैं मनाउन उपत्यकाबाट बाहिरिने गरेका छन् ।
