असार ०४ धनगढी । कैलाली भन्सार कार्यालयले ११ महिनामा सात अर्ब ८१ करोड २८ लाख राजस्व सङ्कलन गरेको छ । कार्यालयले चालु आर्थिक वर्षको साउन देखि जेठ मसान्त सम्म सात अर्ब ८१ करोड २८ लाख राजस्व सङ्कलन गरेको हो ।
कार्यालयका सूचना अधिकारी खिम प्रसाद अर्यालले कार्यालयले भन्सार महसुलतर्फ दुई अर्ब ८९ करोड ६३ लाख, मूल्य अभिवृद्धिकरतर्फ दुई अर्ब ९१ करोड ७५ लाख, अन्तःशुल्कतर्फ १९ करोड ५१ लाख र अन्यतर्फ एक अर्ब ८० करोड ३९ लाख सङ्कलन गरेको जानकारी गराए ।
चालु आर्थिक वर्षमा भन्सार कार्यालयले ११ अर्ब १६ करोड २६ लाख राजस्व सङ्कलनको लक्ष्य एिकोमा ११ महिनामा वार्षिक लक्ष्यको ६९ दशमलव ९९ प्रतिशत राजश्व सङ्कलन भएको छ ।
चालु आर्थिक वर्षको साउनमा ५७ करोड ५० लाख, भदौमा ५३ करोड ८४ लाख, असोजमा ६७ करोड २४ लाख, कात्तिकमा ६२ करोड ७८ लाख, मङ्सिरमा ८१ करोड १३ लाख र पुसमा ६५ करोड ८७ लाख राजस्व सङ्कलन भएको उनले जानकारी गराए ।
त्यसैगरी माघमा ७३ करोड दुई लाख, फागुनमा ७२ करोड ७६ लाख, चैतमा ७८ करोड ८० लाख, वैशाखमा ८१ करोड ८० लाख र जेठमा ८७ करोड १३ लाख राजस्व सङ्कलन भएको उनले बताए ।
बढी राजस्व सङ्कलन हुने पेट्रोलियम पदार्थ लगायत वस्तुको आयातमा कमी हुनु तथा विविध कारणले राजस्व सङ्कलन लक्ष्यमा पुग्न नसकेको सूचना अधिकारी अर्यालले बताए ।
गत आर्थिक वर्षमा ११ अर्ब ५८ करोड २४ लाख वार्षिक राजस्व सङ्कलनको लक्ष्य रहेकोमा सात अर्ब ९१ करोड ८० लाखमात्र सङ्कलन भएको उनले जानकारी गराए ।
