बैशाख २३ डडेल्धुरा । अमरगढी नगरपालिका वठा नम्बर ३ डोटी घटालमा रहेको सुदूरपश्चिमको प्रसिद्ध धार्मिक शक्तिपीठ ‘घटालथान’आन्तरिक पर्यटकीय गन्तव्य बन्दै गएको छ । विगतको तुलनामा पछिल्लो समय अवलोकन तथा पूजाआजा गर्नेको सङ्ख्यामा वृद्धि हुँदै गएकाले ‘घटालथान’आन्तरिक पर्यटकीय गन्तव्य बन्दै गएको हो ।
बुढीघटालका नामले पनि प्रसिद्ध ‘घटालथान’ पर्यटकीय दृष्टिकोणले पनि सम्भावना बोकेको क्षेत्रका रूपमा परिचित हुँदै गएको छ । घटाल क्षेत्र विकास समाजका अध्यक्ष कृष्णराज बोहराले ‘घटालथानलाई मुख्य धार्मिक शक्तिपीठका रूपमा लिने गरिएको बताए । घटालथानको अवलोकन गर्ने पर्यटकको सङ्ख्यामा वृद्धि भएको बताउदै उनले अहिले घटालथानमा सुदूरपश्चिमका विभिन्न जिल्लाका विद्यार्थी अवलोकन गर्न र वनभोज खान आउने गरेको बताए ।
विभिन्न जिल्लाका विद्यार्थी र विदेशबाट गरी दैनिक दुई सयको हाराहारीमा ‘घटालथानमा पर्यटकहरू आउने गरेका उनले जानकारी गराए । विशेष गरेर मङ्गलबार र शनिबार घटालथानमा पूजाआजा गर्नेको घुइँचो लाग्ने गरेको बताउदै उनले सदरमुकाम बागबजारबाट पश्चिम–दक्षिणतर्फ पाँच किलोमिटरको दूरीमा घटालथान रहेको जानकारी गराए ।
जिल्ला सदरमुकामबाट ‘घटालथान’ पुग्न गाडीबाट १५ देखि २० मिनेट र पैदल एक घण्टा समय लाग्ने बताउदै उनले सदरमुकामबाट प्रयोग गरिने मुख्य बाटो बागबजार–आइतबजार–घटाल मन्दिर भएको जानकारी गराए ।
उक्त स्थानमा जान सकिने अन्य वैकल्पिक बाटो चिमिरिकोट–वीरखम्ब–टुँडा–चम्साल भएको बताउदै उनले डोटी खोलाको बीचमा घटाल बाबाको मूर्ति अवस्थित रहेसँगै ऐतिहासिक ढुङ्गै नौला र ऐतिहासिक हिङ्लो पिङ पनि रहेकाले घटाल पुग्नेले पिङको आनन्द लिन सक्ने बताए ।
देउताको प्रभाव र शक्तिलाई कसैले चुनौती दिए भने मूल धामीले आफूले बालुवा खानुका साथै अरू धामीलाई पनि बालुवा खुवाएर शक्ति देखाउने गरेको उनले बताए । घटाल क्षेत्र विकास समाजका अध्यक्ष बोहराले स्थानीयमा धामीले निहुरिएर मुखभरि बालुवा लिएर खाने गरेको जनविश्वास रहिआएको बताए ।
’धामीहरूले पहिले पहिले ६० घडा बालुवा र ६० घडा पानी खाने गर्थे भन्ने किंवदन्ती रहेको र अहिले पनि धामीले सात–आठ मुठीजति बालुवा र पानी घुटुघुटु खाने गरेको उनले बताए । मुखभरिको बालुवा पानीसँगै घुटुघुटु निल्दा पनि दैवी शक्तिकै कारण कुनै स्वास्थ्य समस्या नदेखिएको धामीहरूले दाबी गरेका छन ।
आफ्नो मनोकामना पूरा भएकाहरूले बोकाको बलि दिने गरेको अध्यक्ष बोहराले बताए । किंवदन्ती अनुसार डोट्याली राजा नागी मल्लकी पुत्रविहीन रानीले भारतको गढवालबाट घटाल देउता दाइजोमा ल्याएको र देउतालाई अहिले मन्दिर रहेको स्थानबाट दरबारसम्म लैजान नसकिए पछि घटालबाबा स्थापना गरिएको जनविश्वास रहेको अध्यक्ष बोहराले जानकारी गराए ।
पश्चिमी क्षेत्रमा आस्तिकहरू माझ घटालबाबाले मनोकामना पूरा गरिदिने जनविश्वास रहेको बताउदै उनले खडेरी परेको वर्ष स्थानीयवासीले ‘पानी देऊ’ भन्ने नारा लगाउँदै खोलाको पानी लगेर घटालशिलाको प्वालमा पानी हालेर वर्षाको कामना गर्ने गरेको जानकारी गराए ।
