चैत्र ०५ डडेल्धुरा । डडेल्धुराको परशुराम नगरपालिका वडा नम्बर–६, तातापानी माइतीघर भएकी तीन जना छोरी आमाको किरियामा बसेका छन् । चैत्र १ गते आमा राधादेवी खड्काको मृत्यु भएपछि तीन जना छोरीहरु र्रोहिता कठायत, दुरा थापा र मानमती काकी किरिया बसेका हुन् ।
उनीहरूका ७९ वर्षीय बुवा खड्क सिंह अपाङ्गता भएकाृ र उनका दाजुभाइ नभएकाले तीनै जना छोरीहरु किरिया बसेका हुन । आमाको मृत्युले विक्षिप्त उनीहरू आमाको शव बोकेर घाटसम्म पुग्न नसके पनि काज किरिया गरी रहेका हुन । चार दिदीबहिनीमा कान्छी बहीनी रोहिताले मृत्युअघि नै राधादेवीले छोरीलाई किरिया गरिदिनु भनेको बताईन ।
चारै जना दिदीबहिनी किरिया बस्न तयार भए पनि जेठी दिदी बिर्मा बडुवाल महिनावारी भए पछि किरियामा बस्न नपाएको उनले बताईन । तीन दिदीबहिनी किरिया बसेको बताउदै उनले बाजे भाइतर्फका एक जना दाइ पनि किरिया बसेको जानकारी गराईन । बिर्मा, मानमती, दुरा र रोहिताको बिहे भइसकेको छ ।
आमा बिरामी भएपछि चारै जना दिदीबहिनी फागुनमै माइती घर तातापानी पुगेका थिए । दश दान सक्काएर घरतर्फ लागेका उनीहरु घर पुगेको एक दिनमै आमाको मृत्युको खबर पाए पछि माइतीघर पुगेर किरियामा बसेका हुन् ।
खड्कसिंहका दाइको एक वर्षअघि मात्रै मृत्यु भएको थियो । उनको मृत्युको वर्ष दिन नपुगेकाले उनीतर्फका छोराले किरिया बस्न पाएनन् । ‘मृत्युपछि हामी आफैँ पनि किरियाका लागि तयार भइसकेका थियौँ,’ रोहिताले भनिन् ।
‘छोरीले किरिया बस्नुहुन्न भन्ने कुरा कतैबाट पनि नआएको बताउदै उनले ब्राह्मणले पनि छोरी पनि छोरा जत्तिकै हुन् किरिया बस्दा हुन्छ भने पछि किरियामा बसेको बताईन ।
