फागुन २६ डडेल्धुरा । डडेल्धुराको शीर्ष साना किसान कृषि सहकारी संस्था लिमिटेडमा रकम चोरी भएको एक वर्षपछि प्रहरीले पाँच जनालाई पक्राउ गरेको छ ।
सहकारीका अध्यक्ष बिरेन्द्र बिष्ट, प्रबन्धक हरिशप्रसाद भट्ट, सहायक प्रबन्धक सुमित्रा भट्ट लगायत अन्य सहकारीसँग आबद्ध व्यक्तिहरू गरी प्रहरीले पाँच जनालाई पक्राउ गरेको हो ।
जिल्ला प्रहरी कार्यालयका प्रहरी नायब उपरीक्षक सुगन्ध श्रेष्ठले पक्राउ गरिएका व्यक्तिहरूलाई जिल्ला प्रहरी कार्यालयमा लगिएको बताए ।
प्रारम्भिक अनुसन्धानको क्रममा चोरीमा उनीहरूको संलग्नता देखिएकोले थप अनुसन्धान जारी रहेको प्रहरी नायब उपरीक्षक श्रेष्ठले बताए ।
गत चैत २३ मा परशुराम नगरपालिका वडा नम्बर–४ कटालस्थित सहकारीको कार्यालयबाट ११ लाख १३ हजार चोरी भएको थियो ।
कार्यालयको पछाडिको ढोका खोलेर नगद राखिएको लकर फुटाइ रकम चोरी भएको थियो । सीसीटीभी फुटेजको आधारमा अनुसन्धान जारी रहेको थियो ।
