फागुन ०७ धनगढी । कैलाली र कञ्चनपुरबाट प्रहरीले १० लाख ३८ हजार ६ सय रुपैयाँ बराबरको अबैध सामान बरामद गरेको छ । प्रहरीले मंगलबार भारतबाट अबैध रुपमा भित्र्याईएको उक्त मूल्य बराबरको सामान बरामद गरेको हो ।
कैलालीको धनगढी उपमहानगरपालिका वडा नम्बर–२ सिसा पोष्ट, धनगढी उपमहानगरपालिका वडा नम्बर–३ मिलन चोक, धनगढी उपमहानगरपालिका वडा नम्बर–४ उत्तरबेहडी, धनगढी उपमहानगरपालिका वडा नम्बर–१० चकमेलीघाट र गोदावरी नगरपालिका वडा नम्बर–४ गोदावरी वनदेवी मन्दिर नजिकबाट अबैध रूपमा भारतबाट भन्सार छली गरी ल्याएका अन्दाजी ३ लाख ४२ हजार ५ सय ८० रुपैयाँ मूल्य बराबरको सरप, साबुन, सुटपिस, लेहेङ्गा, टोपी, बुदिया, खेलौना, भाँडा बर्तन, गाडीका फिल्टर, झुमर लाईट, वाल लाईट, बाउण्ड्री लाईट, लिड लाईट, बच्चाको खेलौना लगायतका सामानहरु बेबारिसे अवस्थामा फेला पारी नियन्त्रणमा लिएको प्रहरीले जनाएको छ ।
त्यसैगरी कञ्चनपुर जिल्लाको भीमदत्त नगरपालिका वडा नम्बर–४ बसपार्क नजिक, भीमदत्त नगरपालिका–११ भुजेला र बेलौरी नगरपालिका वडा नम्बर–१ खल्लाबाट अबैध रूपमा भारतबाट भन्सार छली गरी ल्याएका अन्दाजी ६ लाख ९६ हजार २० रुपैयाँ मूल्य बराबरका विभिन्न किसिमका कपडा, पेन्ट, चस्मा, ब्रासेट, बेलुन लाईट, औठी, रुद्राक्ष माला, गोल्डन लकेट, बच्चाको खेलौना, बोईलर कुखुरा, कस्मेटिक, हार्डवेयर, किराना लगायतका सामानहरु जिल्ला प्रहरी कार्यालय कञ्चनपुरले बरामद गरेको छ ।
