फागुन ०६ कञ्चनपुर । सत्तारुढ दल काँग्रेसको भातृसंगठन नेपाल दलित संघले विज्ञप्ती जारी गर्दै गृहमन्त्री रमेश लेखकको बचाउ गरेको छ । गृहमन्त्री लेखकको निर्देशनमा मधेस प्रदेशका अन्र्तजातीय विवाह बन्धनमा बाँधिएका जोडीलाई प्रहरीले यातना दिएर अलग गरेको आरोप व्यापक भए पछि संघले त्यसमा सत्यता नभएको भन्दै विज्ञप्ति सार्वजनिक गरी गृहमन्त्री रमेश लेखकको बचाउ गरेको हो ।
संघका दुई जना केन्द्रीय सदस्य र जिल्ला पदाधिकारीले हस्ताक्षर गरेको विज्ञप्तिमा गृहमन्त्री लेखक विरुद्ध सामाजिक सञ्जाल फेसबुकबाट दुष्प्रचार गरिएको भन्दै ध्यानाकर्षण भएको उल्लेख गरिएको छ । विज्ञप्तीमा सामाजिक सञ्जालमा आन्दोलनको निहुँमा खगेन्द्र सुनार लगायत उच्छृङखल व्यक्तिहरुले कपोकल्पित र अनर्गल अभिव्यक्ति दिई रहेको भन्दै आपत्ति जनाईएको छ ।
संघका केन्द्रीय सदस्यद्वय हरिहर परियार, रमेश दयाल, संघका कञ्चनपुर उप सभापति दिलराम टमटा र उप सचिव दयाराम टमटाले विज्ञप्तिमा हस्ताक्षर गरेका छन । उनीहरु मध्ये केन्द्रीय सदस्य परियार भीमदत्त नगर कार्यपालिका सदस्य हुन् ।
संयुक्त विज्ञप्तिमा गृहमन्त्री लेखकको अनर्गल प्रचारले दलित आन्दोलन कमजोर हुने उल्लेख गरिएको छ । विज्ञप्तिमा नेपाल दलित संघ कञ्चनपुरले अनर्गल तथ्य हीन, कपोकल्पित अभिव्यक्ति तथा उच्छृङ्खलताले नेपालको दलित आन्दोलनलाई कमजोर तुल्याउने भएकाले नेपालका सम्पूर्ण दलित अधिकारकर्मीहरु, दलित संघ संस्थाहरुलाई यस्ता अनर्गल, अशोभनीय तथा कपोकल्पित अभिव्यक्ति उत्छृङ्खलपना देखाउने प्रति सचेत र सजग रहन अनुरोध गरेको छ ।
