माघ ०९ धनगढी । धनगढी उपमहानगरपालिकाले १७ करोड एक लाख दुई हजार ७२ रुपैया राजस्व सङ्कलन गरेको छ । उपमहानगरले चालु आर्थिक वर्षको साउन देखि पुस मसान्त सम्म विभिन्न शीर्षकमा उक्त राजस्व सङ्कलन गरेको हो ।

उक्त अवधिमा सम्पत्ति करबाट एक करोड ९२ लाख ६७ हजार, भूमिकर÷मालपोतबाट एक करोड २३ लाख ६८ हजार, बहालकरबाट तीन करोड ५२ लाख ८३ हजार, अन्य राजस्वबाट तीन करोड ५२ लाख १२ हजार, व्यवसाय करबाट दुई करोड ७९ लाख ७९ हजार र नक्सापास दस्तुरबाट एक करोड ६५ लाख ४८ हजार राजस्व सङ्कलन गरेको उपमहानगरका राजस्व शाखा प्रमुख लेखनाथ ओझाले जानकारी गराए ।

सिफारिस दस्तुरबाट ८३ लाख ५६ हजार, सरकारी सम्पत्तिको बहालबाट ४६ लाख ८३ हजार, प्रशासनिक दण्ड जरिवाना र जफतबाट ३८ लाख ६१ हजार, बेरुजुबाफत १३ लाख ४२ हजार र अन्य प्रशासनिक सेवा शुल्कबाट १३ लाख १३ हजार राजस्व सङ्कलन भएको उनले जानकारी गराए ।

व्यक्तिगत घटना दर्ताबाट सात लाख सात हजार, परीक्षा शुल्कबाट सात लाख १६ हजार, अन्य सामग्री बिक्रीबाट दुई लाख ३४ हजार, नाता प्रमाणित दस्तुरबाट दुई लाख नौ हजार, शिक्षा क्षेत्रको आम्दानीबाट एक लाख ७९ हजार, न्यायिक दस्तुरबाट दुई हजार र बाँकी रकम अन्य दस्तुर शीर्षकबाट सङ्कलन भएको उनले जानकारी दिए ।

राजस्व शाखा प्रमुख ओझाले गत आर्थिक बर्षर्को तुलनामा चालु आर्थिक बर्षको सोही अवधिमा राजस्व सङ्कलनमा वृद्धि भएको उनले बताए । गत आर्थिक बर्षको उक्त अवधिको तुलनामा चालु आर्थिक बर्षमा ९५ लाख सात हजार आठ सय ७९ ले बढी राजस्व सङ्कलन भएको उनले जानकारी गराए ।

उपमहानगरले गत आर्थिक बर्षको ६ महिनामा १६ करोड पाँच लाख ९४ हजार राजस्व सङ्कलन गरेको ओझाले बताए । राजस्व सङ्कलनमा कडाइ हुनुका साथै करको दायरा फराकिलो हुँदै जाँदा राजस्व सङ्कलनमा वृद्धि भएको उनले बताए ।