मंसिर १६ धनगढी । सुदूरपश्चिम प्रदेशका पाँच वटा ठाउँमा शान्तिपूर्ण बाताबरणमा मतदान सम्पन्न भएको छ । एक जना उपाध्यक्ष र चार जना वडाध्यक्षका लागि भएको निर्वाचनमा ५७ प्रतिशतले मतदान गरेका छन् । १७ हजार ३ सय १३ जना मतदाता मध्ये ९ हजार ७ सय ८८ जनाले मतदान गरेको प्रदेश निर्वाचन कार्यालय धनगढीका निर्वाचन अधिकारी प्रेमराज भट्टले जानकारी गराए ।
बाजुराको स्वामिकार्तिक खापरगाउँपालिकामा उपाध्यक्ष लागि ७ हजार ४ सय ६० मतदाता मध्ये ३ हजार ९ सय ३ जनाले मतदान गरेको उनले जानकारी गराए । त्यसैगरी कञ्चनपुरको भीमदत्त नगरपालिका वडा नम्बर–६ को वडाध्यक्षका लागि ५ हजार ४ सय ३४ मतदाता मध्ये २ हजार ९ सय ९२, दार्चुलाको दुहु गाउँपालिका वडा नम्बर–५ मा १ हजार २ ुय ७२ मध्ये ८ सय ७७, डोटीको पुर्वीचौकी गाउँपालिका वडा नम्बर–६ मा १ हजार ५ सय ९३ मध्ये ८ सय ३९ र बझाङको सुर्मा गाउँपालिका वडा नम्बर–४ मा १ हजार ५ सय ५४ मध्ये १ हजार १ सय ७८ जनाले मतदान गरेको प्रदेश निर्वाचन कार्यालयका निर्वाचन अधिकारी भट्टले जानकारी गराए ।
कुल मतदाताको अवस्था अनुसार सबैभन्दा धेरै बझाङमा र थोरै बाजुरामा मत खसेको उनले जानकारी गराए । बाजुरामा ५२ प्रतिशतले मतदान गर्दा बझाङमा ७६ प्रतिशतले मतदान गरेको भट्टले जानकारी गराए । डोटीमा ५३, दार्चुलामा ६९ र कञ्चनपुरमा ५५ प्रतिशतले मतदान गरेको निर्वाचन अधिकृत भट्टले बताए । बिहान ७ बजेदेखि बेलुकी ५ बजेसम्म मतदान भएको उनले जानकारी गराए । एक जना उपाध्यक्ष र चार जना वडाध्यक्षका लागि भएको उपनिर्वाचनमा कर्मचारी खटाउने देखि आवश्यक सुरक्षाकर्मी समेत शनिबार नै परिचालन गरिएको उनले बताए ।
बाजुराको स्वामिकार्तिक खापर गाउँपालिकामा उपाध्यक्षलागि तीन जना महिला उम्मेदवार रहेका छन् । नेपाली काङ्ग्रेसबाट पुल्तीसरा शाही, एकीकृत समाजवादीबाट जवा शाही, एमालेबाट सुलोचनाकुमारी भण्डारी चुनावी मैदानमा छिन् ।
त्यसैगरी बझाङको सुर्मा गाउँपालिका वडा नम्बर–४ मा एमालेबाट लखीचन्द्र बोहरा, काङ्ग्रेसबाट धिरेन्द्र पुजारा र माओवादी केन्द्रबाट पुस्करबहादुर बोहरा गरी तीन जना उम्मेदवार रहेका छन् । डोटीको पुर्वीचौकी गाउँपालिका वडा नम्बर–६ मा एमालेबाट देवबहादुर थापा, काङ्ग्रेसबाट मोहन थापा, माओवादी केन्द्रबाट देवीलाल थापा र राष्ट्रिय स्वतन्त्र पार्टीबाट जानकीकुमारी खड्का उम्मेदवार छन् ।
दार्चुलाको दुहुँ गाउँपालिका वडा नम्बर–५ मा एमालेबाट मानसिंह बडाल, काङ्ग्रेसबाट धनसिंह कुँवर, माओवादीबाट विरसिंह कार्की र स्वतन्त्रबाट लालबहादुर कुँवर गरी चार जना उम्मेदवार छन् । त्यसैगरी कञ्चनपुरको भीमदत्त नगरपालिका वडा नम्बर–६ मा सबैभन्दा बढी १२ जना उम्मेदवार रहेका छन् ।
एमालेबाट बहादुर चन्द, काङ्ग्रेसबाट प्रकाश चन्द, माओवादीबाट नानाराम कोली, राष्ट्रिय स्वतन्त्र पार्टीबाट रामदत्त भट्ट, राप्रपाबाट शुशिलकुमार भट्ट, जनमत पार्टीबाट यादवबहादुर चन्द, एकीकृत समाजवादीबाट जितेन्द्रबहादुर चन्द, नागरिक उन्मुक्ति पार्टीबाट हरिस डगौरा, नेपाल मजदुर किसान पार्टीबाट दलबहादुर बोहरा, राप्रपा नेपालबाट दिलबहादुर धामी, स्वतन्त्रबाट युवराज चन्द र स्वतन्त्रबाटै थानेश्वर लेखक उम्मेदवार रहेका छन ।
