असार ०१ कञ्चनपुर । कञ्चनपुरको लालझाडी गाउँपालिकाले सरकारी बजेटको चरम दुरुपयोग गरेको पाईएको छ । गाउँपालिकाले एकैदिन ११ पटक बैठक राखेर ११ पटक नै भत्ता बुझेर सरकारी बजेटको चरम दुरुपयोग गरेको पाईएको हो । २०७९ भदौं १६ गते ८२ जनाले एकै दिनमा ११ पटक भत्ता बुझेका हुन ।
आर्थिक कार्यविधि तथा वित्तीय उत्तरदायित्व नियमावली २०७७ को नियम ३९ को उपनियम ५ मा जिम्मेवार व्यक्तिले खर्च लेख्नु अघि त्यस्तो रकम खर्च गर्न वा भुक्तानी दिन आवश्यक बिल भरपाई र कागजात संलग्न भए नभएको भुक्तानी दिन रित पुगे नपुगेको जाँच गर्नु पर्ने व्यवस्था रहेको छ । तर लालझाडी गाउँपालिकाले भने नियमावली र उपनियमको समेत कुनै ख्याल नगरे एकैदिन ११ वटा बैठक राखेर ११ पटक बजेटको चरम दुरुपयोग हुने गरेर भत्ता बाँडेको पाईएको हो ।
लालझाडी गाउँपालिकाले पदपुर्ति समितिको बैठक वाफत एकैदिन पटक पटक गरेर ११ वटा बैठक राखेको पाईएको छ । साथै एकै दिन ११ पटक भत्ता समेत बाँडेको पाईएको हो । लालझाडी गाउँपालीकाले २०७९ भदौ १६ गते दिउँसो ४ः४५ मा ८ जनाको बैठक राखेर १० हजार दुई सय, दिउँसो ४ः३० मा ९ जनाको बैठक राखेर ११ हजार ४ सय ७५, ४ः१५ मा पाँच जनाको बैठक राखेर ६ हजार ३ सय ७५ र फेरी दिउसो ४ बजे बैठक राखेर ६ हजार ३ सय ७५ रुपैयाँ भत्ता बाडेको पाईएको हो ।
सोही दिन दिउँसो ३ः२० मा ९ जनाको बैठक राखेर ११ हजार ४ सय ७५, दिउँसो १ः१५ बजे ५ जनाको बैठक राखेर ६ हजार ३ सय ७५, विहान ८ बजेट ५ जनाको बैठकर राखेर ६ हजार ३ सय ७५, मध्यान्ह १२ः५० मा ९ जनाको बैठक राखेर ११ हजार ४ सय ७५, १२ः३५ मा फेरी ९ जनाको बैठक राखेर ११ हजार ४ सय ७५ रुपैयाँ भत्ता बाँडिएको पाईएको छ । त्यसैगरी सोही दिन विहान ९ः२५ मा ९ जनाको बैठक राखेर ११ हजार ४ सय ७५ र विहान ९ जनाको बैठक राखेर ११ हजार ४ सय ७५ गरेर एकैदिन एक लाख चार हजार ५ सय ५० रुपैयाँ नियमावली विपरीत गाउँपालिकाले भत्ता बाँडेको पाईएको हो ।
