चैत्र २३ बाजुरा । बाजुरा कारागारमा क्षमता भन्दा तीन गुणा बढी कैदी बन्दी हुँदा कारागार ब्याबश्थापनमा समस्या भएको छ । भूकम्पले चर्किएर चिराचिरा परेको जीर्ण भवनमा क्षमता भन्दा तीन गुणा बढी कैदीबन्दी हुँदा कारागार ब्याबश्थापनमा समस्या भएको हो । अपराध गरेर सुधारका लागि कारागारमा राखिएका कैदीबन्दीहरुले भूकम्पका कारण चिराचिरा परेको भवनमा डरैडरमा रात बिताउन बाध्य भएको उनीहरुले बताएका छन ।
विभिन्न अपराधमा संलग्न भएर अदालतबाट कैद सजाय पाएका कैदीबन्दीहका लागी जेलभित्र बस्न पर्याप्त भवन नहुँदा उनीहरुले समस्या भोग्दै आएका छन । वर्षौ पहिले बनेका तीन वटा ढुङगाले छाएका भवन जीर्ण हुनुकासाथै झ्याल समेत नहुँदा कष्टकासाथ रात बिताउन परेको उनीहरुले बताउका छन । कैद सजाय भोगिरहेका उनीहरुले जेलभित्र पनि सहज रुपमा जीवनयापनको महसुस गर्न नसकेको बताएका छन । बस्नका लागि बास र शौचालयको अवस्था पनि दयनीय भएको उनीहरुले बताएका छन ।
भवन अभावका कारण एउटा कोठामा २५ जना भन्दा बढी कैदी बन्दीहरुले उभिएरै रात कटाउनु परेको उनीहरुले बताएका छन । कारागार प्रमुख हंसबहादुर बोहराले जिल्ला कारागारमा क्षमता भन्दा तीन गुणा बढी कैदीबन्दी हुँदा व्यवस्थापनमा समस्या भएको बताए । उनले २५ जनाको क्षमता भएको जिल्ला कारागारमा अहिले ७८ जना कैदीबन्दी राख्नु परेको बताए ।
क्षमता भन्दा बढी कैदीबन्दी भएकाले उनीहरुलाई बस्नका लागि कोठाको व्यवस्थापन हुन नसक्दा रातभर जागराम बसेर रात बिताउने गरेको कारागार प्रमुख बोहराले बताए । पटक पटकको भूकम्पका कारण चर्किएर चिराचिरा परेको जीर्ण भवनमा कैदीबन्दीहरु बस्नु पर्दा उनीहरु जोखिममा रहेको कारागार प्रमुख बोहराले बताए । भवन निर्माणका लागि जग्गा पर्याप्त भएको बताउदै उनले बजेट नभएकाले समस्या भएको बताए । प्रदेश र संघ सरकारसँग माग गर्दा पनि सुनुवाइ नभएको उनले जानकारी गराए ।
भवन निर्माणका लागि सात रोपनी जग्गा भए पनि आवश्यक बजेट नहुँदा जीर्ण भवनमा कैदीहरु राख्नु पर्ने बाध्यता रहेको उनले जानकारी गराए । भवन व्यवस्थापन गर्न नसके कारागारभित्र रहेको खाली ठाउँमा त्रिपाल हालेर कैदी बन्दीलाई राख्नुपर्ने बोहराले बताए । कारागारको क्षमता २५ जना भए पनि तीनगुणा बढी बस्दैँ आएको जानकारी गराउदै उनले अब खाली ठाउँमा त्रिपाल हालेर बासस्थानको व्यवस्थापन गर्नुपर्ने अवस्था आएको कारागार प्रमुख बोहराले जानकारी गराए ।
