साउन १४ कञ्चनपुर । कञ्चनपुरको बेलडाँडी गाउँपालिकाले ८ महिना अगाडी स्थगित गरेको रोजगार सहायक पदको परीक्षा अनिश्चित भएको छ । गाउँपालिकाले स्थानीय तहमा प्रधानमन्त्री रोजगार कार्यक्रम अन्तर्गत १ जना रोजगार सहायक नियुक्त गर्न गत बर्षको भाद्र महिनामा आवेदन संकलन गरेको भए पनि परीक्षा संञ्चालन गर्न नसक्दा अनिश्चित भएको हो ।
गाउँपालिकाले प्रथम पटक प्रकाशित विज्ञापन अनुसार कुनै पनि उम्मेदवार उतीर्ण नहुँदा दोस्रो पटक भाद्र १६ गते विज्ञापन आह्वान गरेको थियो । दोस्रो पटक आवेदन दिएकाहरुलाई गाउँपालिकाले २०७९ मंसिर १७ गते परीक्षा तोकेको भए पनि परीक्षा १ दिन अगाडी मात्रै स्थगित गरेको थियो । परीक्षा तोकिएको एक दिन अगाडी गाउँपालिकाले सूचना जारी गर्दै महालेखा परिक्षणको कार्य शुरु भएकाले परीक्षा अर्को सूचना प्रकाशित नहुन्जेल सम्मका लागि स्थगित गरेको जानकारी गराएको थियो ।
उक्त परीक्षामा सहभागिताका लागि गाउँपालिकाले १० जनाको नाम सर्ट लिष्टमा राखेर प्रकाशित गरेको छ । अर्को सूचना प्रकाशित नहुँदा सम्मका लागि स्थगित गरिएको परीक्षा ८ महिना बितिसक्दा पनि संचालन हुन सकेको छैन । परीक्षा संचालन हुने बिषयमा गाउँपालिका अध्यक्ष हरिश्चन्द्र रानाले टालटुले जवाफ दिदैं आएका छन । उनले परीक्षाको सूचना प्रकाशित हुने पटक पटक बताउँदै आए पनि सूचना भने प्रकाशित भएको छैन ।
पालिकाका रोजगार संयोजक कृष्णबहादुर चन्दले आफुले पटक–पटक यस विषयलाई बैठकमा राख्दै आएको भए पनि सुनुवाइ नभएको बताएका छन । ८ महिना सम्म पनि परीक्षा संञ्चालन नहुँदा परीक्षाको तयारीमा रहेका आवेदक पनि अन्यौलमा परेका छन । रोजगार सहायक पदका लागि श्रम रोजगार तथा सामाजिक सुरक्षा मन्त्रालयले कर्मचारी नियुक्ति सम्बन्धी निश्चित मापदण्ड तोके पनि परीक्षा र नियुक्त लगायतका कार्य प्रकियाहरु भने स्थानीय तहले नै गर्नुपर्ने प्रावधान रहेको छ ।
