असोज ०५ धनगढी । कैलालीबाट अवैध लागूऔषध खैरो हिरोइन सहित पाँच जनालाई प्रहरीले पक्राउ गरेको छ । कैलालीका दुई वटा छुट्टाछुट्टै स्थानबाट प्रहरीले पाँच जनालाई लागूऔषध खैरो हिरोइन सहित पक्राउ गरेको हो ।
जानकी गाउँपालिका वडा नम्बर–८ भोक्सीबाट १ ग्राम ८ सय ८० मिलिग्राम खैरो हिरोइन जस्तो देखिने धुलो पदार्थ सहित जोशीपुर गाउँपालिका वडा नम्बर–३ बस्ने ४८ वर्षीय प्रमेश्वर डगौरा थारूलाइ प्रहरीले पक्राउ गरेको हो ।
उनलाई इलाका प्रहरी कार्यालय टीकापुरबाट खटिएको प्रहरी टोलीले आइतबार दिउँसो शंका लागी चेकजाँच गर्ने क्रममा उक्त पदार्थ फेला पारेपछि पक्राउ गरेको हो ।
त्यसैगरी, धनगढी उपमहानगरपालिका वडा नम्बर–७ भानुचोकबाट ४ सय ६० मिलिग्राम ब्राउनसुगर जस्तो देखिने धुलो पदार्थ सहित चार जनालाई प्रहरीले पक्राउ गरेको हो । धनगढी उपमहानगरपालिका वडा नम्बर–१ बसन्त टोल बस्ने २१ वर्षीय असिम चौधरी समेत चार जनालाई प्रहरीले पक्राउ गरेको हो ।
उनीहरूलाई जिल्ला प्रहरी कार्यालय कैलालीबाट खटिएको प्रहरी टोलीले आइतबार राति शंका लागी चेकजाँच गर्ने क्रममा उक्त पदार्थ फेला पारेपछि पक्राउ गरेको हो । दुवै घटनाका सम्बन्धमा प्रहरीले आवश्यक अनुसन्धान गरिरहेको जनाएको छ ।
