असोज ०४ धनगढी । कैलाली बहुमुखी क्याम्पसले सुदूरपश्चिम नवउद्यमी सम्मेलन गर्ने भएको छ । क्याम्पस अन्तर्गतको इन्क्युबेसन सेन्टरको आयोजना, राष्ट्रिय योजना आयोग तथा सुदूरपश्चिम प्रदेश सरकारको सहयोग र विभिन्न स्थानीय तह, बैंक, वित्तीय संस्थाको साझेदारीमा आगामी कात्तिक १३ गते देखि १५ गते सम्म क्याम्पसले सम्मेलन गर्ने भएको हो ।
सुदूरपश्चिम विश्वविद्यालय अन्तर्गत रहेको क्याम्पसले आइतबार धनगढीमा पत्रकार सम्मेलन गरी यही क्षेत्रमा केही गर्ने सोच भएका युवालाई उद्यमशीलतातर्फ प्रोत्साहन गर्ने उद्देश्यले सम्मेलन गर्न लागेको जानकारी गराएको हो ।
इन्क्युबेसन सेन्टरका संयोजक सहप्राध्यापक डा. राजेन्द्रवीर चन्दले युवाहरुलाई उद्यमशीलतामा जोड्न सम्मेलन गर्न लागिएको बताए । व्यवसाय लगायत विभिन्न विधामा लुकेर रहेका प्रतिभालाई प्रस्फुटन गर्न सम्मेलन सहयोगी हुने उनले बताए ।
स्वरोजगार बन्न र रोजगारी सिर्जना गर्न चाहने युवालाई ‘मेन्टर सीप’ र उद्यम सुरु गर्न आर्थिक सहयोग पनि गरिने सहप्राध्यापक चन्दले पत्रकार सम्मेलनमा जानकारी गराए । क्याम्पसका अनुसार ७० जनालाई विज्ञहरुबाट प्रशिक्षण दिइनुका साथै व्यवसाय, उद्यम सुरु गर्न विनाब्याजमा दुईदेखि चार लाख रुपैयाँसम्म सहयोग गरिने छ ।
इन्क्युबेसन सेन्टरका सदस्य समेत रहेका कैलाली उद्योग वाणिज्य संघका अध्यक्ष पुस्करराज ओझाले स्नातक गरेका र नवउद्यममा जान चाहने, विदेशमा सीप सिकेर फर्केका र यहीँ केही गर्ने चाहना भएकालाई सम्मेलन उपयुक्त मञ्च भएको बताए ।
सम्मेलनमा सहभागिताका लागि स्विकृत गरिने ७० वटा प्रस्ताव मध्ये ३५ जना विद्यार्थी र ३५ जना व्यवसायीबाट रहने क्याम्पस प्रमुख बिष्टले जानकारी गराए । सुदूरपश्चिम विश्वविद्यालयका रजिष्ट्रार प्रा.डा. तारादत्त भट्टले सुदूरपश्चिम नवउद्यमी सम्मेलन गर्न विश्वविद्यालयले आवश्यक सहयोग र समन्वय गर्ने बताए ।
