असोज ०४ धनगढी । धनगढी उपमहानगरपालिका वड नम्बर–१७ पथरीस्थित शिवगंगा नदीमा पक्की पुल नहुँदा स्थानीय बासिन्दाले वर्षौंदेखि समस्या झेल्दै आएका छन् । छोटो दूरीको सडकबाट धनगढी बजार तथा वडा नम्बर १६ र १७ आवत जावत गर्न नदी पार कगर्नुपर्ने भए पनि नदीमा पुल नहुँदा स्थानीयले वर्षौंदेखि समस्या झेल्दै आएका हुन ।
पुल नहुँदा वैकल्पिक बाटो वा डल्लबको भर पर्नुपर्ने स्थानीयको बाध्यता छ । धनगढीका विभिन्न वडा तथा अन्य क्षेत्रबाट वडा नम्बर १६ र १७ प्रवेश गर्ने नागरिकले शिवगंगा नदी पार गर्नुपर्ने अवस्था छ । विशेषगरी धार्मिक तथा पर्यटकीय स्थलका रूपमा रहेको श्री बेहडाबाबा मन्दिर जाने भक्तजनले समेत यही नदी पार गरेर जानु पर्ने अबश्था छ ।
आस्थाको केन्द्रका रूपमा रहेको बेहडाबाबा मन्दिरमा नियमित रूपमा ठूलो संख्यामा भक्तजन पुग्ने गरे पनि नदीमा पुल नहुँदा उनीहरूले आवत जावतमा समस्या र थप खर्च व्यहोर्नुपरेको स्थानीयले गुनासो गरेको छ । पुलको अभावमा नदी वारपार गर्न अहिले डल्लब अर्थात् बैलगाडाको सहारा लिनुपर्ने अवस्था छ । डल्लबबाट नदी पार गरेबापत प्रतिव्यक्ति ३० रुपैयाँ र मोटरसाइकलका लागि १ सय रुपैयाँ शुल्क तिर्नुपर्ने स्थानीयले बताएका छन ।
मन्दिर दर्शनका लागि जाने भक्तजनले आउँदा–जाँदा दुईपटक शुल्क तिर्नुपर्दा थप आर्थिक भार पर्ने गरेको छ । नदी पार गर्ने क्रममा जोखिम समेत उत्तिकै रहेको स्थानीयले बताएका छन । नदीमा पानीको बहाव बढेका बेला डल्लबबाट वारपार गर्न झन् जोखिम हुने गरेको उनीहरूले बताएका छन । पुल निर्माण नहुँदासम्म आफूहरूले डल्लब सञ्चालन गरेर नागरिकलाई वारपार गराइरहने डल्लब चालकले बताएका छन ।
यसबाट स्थानीय केही व्यक्तिले रोजगारी समेत पाएका छन् । धनगढीको जखौर ताल हुँदै बेहडाबाबा मन्दिर जाने सडक कालोपत्रे भइसकेको भएपनि शिवगंगा नदीमा पुल नहुँदा सडक पूर्वाधार जोडिए पनि आवत जावत सहज हुन सकेको छैन । स्थानीयका अनुसार सडक राम्रो भए पनि नदीमा पुल नहुँदा यात्राको बीचमै अवरोध आउने गरेको छ ।
छोटो दूरीमा रहेको धनगढी बजार पुग्न समेत पुलको अभावमा घुमाउरो बाटो प्रयोग गर्नुपर्ने बाध्यता छ । कतिपय स्थानीयले शिवगंगा नदी पार गर्ने छोटो बाटो छाडेर कनरी हुँदै लामो दूरीको सडक प्रयोग गर्ने गरेका छन ।
वर्षौंदेखि पक्की पुलको माग हुँदै आए पनि सम्बन्धित निकायबाट ठोस पहल हुन नसकेको स्थानीयले गुनासो गरेका छन ।
प्रदेशको राजधानी समेत रहेको धनगढीमा महत्वपूर्ण धार्मिकस्थल र बस्ती जोड्ने सडकमा पुल नहुँदा नागरिकले दैनिक रूपमा समस्या भोग्नुपरेको उनीहरूको भनाइ छ । स्थानीयले शिवगंगा नदीमा यथाशीघ्र पक्की पुल निर्माण गरी वडा नम्बर १६ र १७ सहित बेहडाबाबा मन्दिर सम्मको आवतजावत सहज बनाउन तीनै तहका सरकारसंग माग गरेका छन् ।
नागरिकको दैनिक आवतजावतसँगै धार्मिक तथा पर्यटकीय गतिविधि समेत जोडिएको यस क्षेत्रमा पुल निर्माणलाई प्राथमिकताका साथ अघि बढाउनु पर्ने उनीहरूको माग छ ।
