भदौ २४ धनगढी । आफूलाई वन अधिकृत (फरेष्ट अफिसर) भनि परिचय दिँदै ठगी धन्दा चलाउँदै आएका एक जना युवकलाई कैलाली प्रहरीले धनगढीबाट पक्राउ गरेको छ । कैलालीको कैलारी गाउँपालिका वडा नंम्बर ०४ बस्ने २५ वर्षका दिपेश चौधरीलाई प्रहरीले पक्राउ गरेको हो ।
जिल्ला प्रहरी कार्यालय कैलालीका अनुसार चौधरीले एक युवतीलाई प्रेम सम्बन्धमा पारेर उनको घरपरिवार तथा नातेदारहरूलाई समेत वन कार्यालयमा करारमा जागिर लगाइदिने लोभ देखाएर जागिरको प्रलोभनमा पारी नक्कली परिचय पत्र र नियुक्ति पत्र समेत बनाएर रकम ठगी गरेको पाइएको छ ।
विशेष सूचनाका आधारमा जिल्ला प्रहरी कार्यालय कैलालीबाट खटिएको प्रहरी टोलीले उनलाई भदौ २२ गते धनगढी उप–महानगरपालिका वडा नम्बर ०१ स्थित डिभिजन वन कार्यालय कैलाली नजिकैको सडक खण्डबाट पक्राउ गरेको हो ।
पक्राउ गरिएका चौधरीमाथि ठगी कसुरमा मुद्दा दर्ता गरी जिल्ला अदालत कैलालीबाट म्याद थप गरी आवश्यक अनुसन्धान भइरहेको जिल्ला प्रहरी कार्यालय कैलालीका सूचना अधिकारी तथा प्रहरी नायव उपरीक्षक योगेन्द्र तिमिल्सिनाले जानकारी गराएका छन ।
