भदौ २४ कञ्चनपुर । कञ्चनपुरको भीमदत्त नगरपालिका वडा नम्बर–११ स्थित भन्सार कार्यालय नजिकबाट भन्सार छली गरी भारतबाट ल्याइएका सामान सहित नौ जना महिलालाई प्रहरीले नियन्त्रणमा लिएको छ ।
ईलाका प्रहरी कार्यालय गड्डाचौकीबाट खटिएको प्रहरी टोलीले मंगलबार साँझ अन्दाजी १ लाख रुपैयाँ बराबरको चिनी, दाल, खाने तेल, सोनपापडी तथा अन्य किराना सामान फेला पारी नौ जनालाई नियन्त्रणमा लिएको हो ।
बेदकोट नगरपालिका वडा नम्बर–१० की ३२ वर्षीया ज्योती डगौरा, २४ वर्षीया सोनु डगौरा र २० वर्षीया नेहा चौधरी, भीमदत्त नगरपालिका वडा नम्बर–२ की ३५ वर्षीया तारा कुँवर र ४० वर्षीया भावना चन्द, भीमदत्त नगरपालीका वडा नम्बर–८ की ३५ वर्षीया लक्ष्मी नेपाली, तथा भीमदत्त नगरपालीका वडा नम्बर–१९ की २४ वर्षीया पशुपती धामी, ४० वर्षीया बिमला चन्द र ३५ वर्षीया मिना धामीलाई प्रहरीले नियन्त्रणमा लिएको हो ।
प्रहरीले बरामद सामान सहित उनीहरूलाई आवश्यक कारबाहीका लागि भन्सार कार्यालय गड्डाचौकी, कञ्चनपुर पठाएको जनाएको छ ।
