जेठ ११ दार्चुला । दार्चुलास्थित महाकाली नदीमाथि निर्माण गरिएको नेपाल–भारत जोड्ने मोटरेबल पुल सञ्चालनमा ढिलाइ भएको छ । नेपालतर्फको १ सय ३० मिटर मुख्य सडक निर्माण समेत अन्तिम चरणमा रहेका बेला मोटरेबल पुल सञ्चालनमा ढिलाइ भएको हो । नेपालतर्फको सडक निर्माण गरिरहेको निर्माण कम्पनीका सबइन्जिनियर दौलतसिंह गन्डीले सडकमा कङ्क्रिटको मात्रै काम गर्न बाँकी रहेको बताउदै केही दिनमै पूरा हुने बताए ।
नेपाल सरकार र भारत सरकारको सहमतिमा नेपालको महाकाली नगरपालिका वडा नम्बर–८, असिगडा र भारतको धार्चुला तहसिल अन्तर्गत पर्ने छारछुम क्षेत्रमा १ सय १० मिटर लम्बाइको दुई लेनको मोटरेबल पुल निर्माण गरिएको हो । स्थानीय नरेश भट्टले निर्माण पूरा भइसकेको पुल सञ्चालन गर्नुपर्ने बताएका छन ।
स्थानीय व्यापार, पर्यटन क्षेत्रलाई माथि उठाउन दुई देशको सीमामा बनेको पुल यथाशीघ्र सञ्चालन गर्नुपर्ने उनले बताए । दार्चुलाका प्रतिनिधि सभा सदस्य गणेशसिंह ठगुन्नाले पुल सञ्चालनका लागि पहल गर्ने बताए । पुलको तत्कालीन उद्योग, वाणिज्य तथा आपूर्तिमन्त्री दिलेन्द्रप्रसाद बडु र उत्तराखण्डका मुख्यमन्त्री पुष्करसिंह धामीले संयुक्त रूपमा शिलान्यास गरेका थिए ।
पुलनजिक पर्ने नेपालतर्फको जग्गा प्राप्तिको काम पूरा भइसकेको तथा भन्सार, क्वारेन्टाइन, सशस्त्र प्रहरी र नेपाल प्रहरी बस्ने संरचना निर्माण हुन बाँकी रहेको दार्चुलाका सहायक प्रमुख जिल्ला अधिकारी मोहनसिंह धामीले जानकारी गराए । पुल सञ्चालन गर्ने विषयमा स्थानीय प्रशासनमा केन्द्रबाट कुनै जानकारी नआएको उनले बताए ।
सम्झौता अनुसार पुल निर्माण २०२३ अक्टोबरमा सक्नुपर्ने भए पनि थप काम गर्नुपर्ने भएपछि निर्माण लम्बिएको सबइन्जिनियर गन्डीले बताए । पुलको निर्माण भारतीय कम्पनी पी एन्ड आर इन्फ्राप्रोजेक्ट लिमिटेड पन्जाबले गरेको थियो । नेपाल–भारत जोड्ने मोटरेबल पुल निर्माणले दुई देशबिचको व्यापारिक, पर्यटकीय र सांस्कृतिक पक्षमा महत्वपूर्ण टेवा पुग्ने दार्चुला उद्योग वाणिज्य सङ्घका अध्यक्ष सुरेशसिंह थापाले बताए ।
सुदूरपश्चिम प्रदेशको पहाडी जिल्लामा भारत जोड्न मोटरेबल पुल दार्चुलामा निर्माण भएको हो । पुल सञ्चालनमा आए पछि दार्चुला, बैतडी, बझाङ लगायत सुदूरपश्चिमका पहाडी जिल्लाका साथै भारत र चीन सम्मको व्यापार दार्चुलाको नाकाबाट हुन सक्ने जिल्ला समन्वय समिति प्रमुख महादेव बडुले बताए ।
