जेठ ११ धनगढी । नेपाली कांग्रेस सुदूरपश्चिम प्रदेश कार्यसमितिले पार्टीको विशेष महाधिवेशनबाट आएको केन्द्रीय नेतृत्वले जनअपेक्षा अनुसार काम गर्न नसकेको निष्कर्ष निकालेको छ । धनगढीमा सम्पन्न प्रदेशस्तरीय भेलाले पार्टी भित्रको आन्तरिक कलह, गुटबन्दी र वर्तमान सरकारको कार्यशैली प्रति गम्भीर प्रश्न उठाउँदै ११ बुँदे घोषणापत्र जारी गर्दै उक्त निष्कर्ष निकालेको हो । प्रदेश सभापति वीरबहादुर बलायरले जारी गरेको विज्ञप्तिमा विशेष महाधिवेशनका कारण पार्टीमा विभाजनको रेखा कोरिएको र यसले भर्खरै सम्पन्न निर्वाचनमा समेत नकारात्मक असर पारेको उल्लेख गरिएको छ ।
भेलाले १५ औँ महाधिवेशनलाई निष्पक्ष र धाँधलीरहित बनाउन साविक र वर्तमान केन्द्रीय समितिको समन्वयमा एउटा ‘तटस्थ निर्वाचन समिति’ गठन गर्न माग गरेको छ । विशेष महाधिवेशनले १४ औँ महाधिवेशनका निर्वाचित प्रतिनिधिहरूलाई विस्थापित गरेको भन्दै भेलाले असन्तुष्टि जनाएको विज्ञप्तिमा उल्लेख गरिएको छ । विज्ञप्तिमा निवर्तमान सभापति शेरबहादुर देउवामाथि विगतमा लगाइएका आरोप–प्रत्यारोपबारे समीक्षाको माग गरिएको छ ।
देउवालाई ‘साहसी नेतृत्व’ र ‘अथक योद्धा’ भएको समीक्षा गर्दै भेलाले उपचाररत देउवाको शीघ्र स्वास्थ्य लाभको कामना समेत गरेको छ । सरकार अपारदर्शी भएको, संसद्प्रति उत्तरदायी नरहेको र अध्यादेश मार्फत शासन चलाउन खोजेको आरोप लगाउदै सुदूरपश्चिम कांग्रेसले सरकारको आलोचना गरेको छ । धान रोपाइँको सिजनमा मलको अभाव हुनु र पेट्रोलियम पदार्थको मूल्यवृद्धिका कारण नागरिक प्रताडित भएको विषयमा विज्ञप्ति मार्फत सरकारको ध्यानाकर्षण गराइएको छ । गुरुयोजना बिना सुकुमबासी हटाउने सरकारको कार्य अमानवीय रहेको ठहर गरिएको छ ।
भेलाले क्रियाशील सदस्यता अद्यावधिकका नाममा लिइने शुल्क र प्रक्रियामा अल्झिनु भन्दा सङ्गठन सुदृढीकरणमा लाग्न नेतृत्वलाई सुझाव दिएको छ । साथै, विधानलाई आमूल परिवर्तन गर्ने प्रयास प्रति असहमति जनाउँदै विधान संशोधन न्यायसम्मत र वैधानिक प्रक्रिया अनुसार हुनुपर्नेमा जोड दिईएको छ । कांग्रेसले सदनमा सशक्त प्रतिपक्षको भूमिका निर्वाह गर्न नसकेको जनधारणा बढिरहेको उल्लेख गर्दै जनताका समस्या बेरोजगारी, भ्रष्टाचार र आर्थिक सङ्कटमा स्पष्ट दृष्टिकोणका साथ अगाडी बढ्न केन्द्रीय नेतृत्वलाई आग्रह गरिएकोे छ ।
भेलाले बाजुरा जिल्लाको रानीसैन क्षेत्रलाई सामरिक र पर्यटकीय महत्वको क्षेत्रका रूपमा विकास गर्न र त्यहाँ राज्यको उपस्थिति सुनिश्चित गर्न सरकारसँग माग गरेको छ । सुदूरपश्चिमका ९ वटै जिल्लाका नेता–कार्यकर्ता सहभागी भेलाले पार्टीलाई एकताबद्ध र जनआधारित बनाउन नेतृत्वमा लचकता, सहनशीलता र त्याग हुनुपर्ने निष्कर्ष निकालेको विज्ञप्तिमा उल्लेख गरिएको छ । भेलामा पूर्व केन्द्रीय सदस्य एनपी साउँद,पूर्व केन्द्रीय सदस्य रमेश लेखक,कांग्रेस सुदूरपश्चिम सभापति वीर बहादुर बलायरले एकता अपरिहार्य भएको बताएका थिए ।
निवर्तमान सभापति देउवामाथि विगतमा लगाइएका आरोप–प्रत्यारोपले पार्टी संगठनमा प्रभाव परेकाले गम्भीर समीक्षा आवश्यक रहेको बताएका थिए । घोषणा पत्रमा पार्टी एकता, आन्तरिक समन्वय र १५ औँ महाधिवेशन, निर्वाचन परिणाम र नेतृत्व प्रतिको जनधारणा, पार्टीको इतिहास, योगदान र वर्तमान अवस्थाबारे समीक्षा, संविधान, लोकतन्त्र, सुशासन र वर्तमान सरकार सम्बन्धी विषय, क्रियाशील सदस्यता अद्यावधिक र संगठन सुदृढिकरण बुँदा समेटिएका छन ।
