जेठ ०७ धनगढी । शहीद दशरथ चन्द स्वास्थ्य विज्ञान विश्वविद्यालयको रिक्त उपकुलपति र रजिस्ट्रार पदमा नियुक्तिका लागि दरखास्त माग गरिएको छ । नाम सिफारिस गर्न गठित सिफारिस समितिले बिहीबार सार्वजनिक सूचना जारी गर्दै इच्छुक तथा योग्य नेपाली नागरिकबाट दरखास्त माग गरेको हो ।
समितिका अनुसार गत जेठ ५ गते स्वीकृत भएको ‘शहीद दशरथ चन्द स्वास्थ्य विज्ञान विश्वविद्यालयको उपकुलपति र रजिस्ट्रार छनौट तथा सिफारिस सम्बन्धी कार्यविधि, २०८३’ बमोजिम दरखास्त माग गरिएको हो । सूचना प्रथम पटक प्रकाशित भएको मितिले १० दिनभित्र इच्छुक उम्मेदवारले दरखास्त पेस गरिसक्नु पर्ने उल्लेख गरिउको छ ।
आवेदन बुझाउने अन्तिम दिन सार्वजनिक बिदा परेमा त्यसपछि कार्यालय खुलेको दिनलाई अन्तिम म्याद मानिने सूचनामा उल्लेख गरिएको छ । सूचना अनुसार शिक्षा तथा खेलकुद मन्त्रालय, सिंहदरबार स्थित प्राविधिक शिक्षा शाखामा कार्यालय समय भित्र आवेदन दर्ता गराउनुपर्ने छ ।
आवेदन कार्यविधिको अनुसूची–१ मा उल्लेख गरिएको ढाँचा अनुसार पेस गर्नुपर्ने व्यवस्था गरिएको छ । यस सम्बन्धी विस्तृत कार्यविधि तथा अन्य जानकारी शिक्षा तथा खेलकुद मन्त्रालयको आधिकारिक वेबसाइट मार्फत प्राप्त गर्न सकिने समितिले जानकारी गराएको छ ।
