जेठ ०६ कञ्चनपुर । कञ्चनपुरको दक्षिणी सीमा क्षेत्रबाट लागू औषधको ओसार पसार बढ्दै गएपछि सशस्त्र प्रहरीले विद्यालयहरूमा सचेत गराउन कक्षा सञ्चालन गरेको छ । बुधवारबाट सशस्त्र प्रहरी बल नेपाल सीमा सुरक्षा गुल्म बेलौरीले आफ्नो क्षेत्रका विद्यालयहरूमा लागू औषध दुव्र्यसन र मादक पदार्थ सेवनबाट हुने असरहरू भन्ने विषयमा कक्षा सञ्चालन गरेको हो ।
गुल्मका गुल्मपति सशस्त्र प्रहरी नायब उपरीक्षक योग्य बस्नेतले बेलौरी नगरपालिका वडा नम्बर– ४ शान्तिनगर स्थित उग्रतारा बाल विद्यालयका ८, ९ र १० कक्षामा अध्ययनरत विद्यार्थीहरूलाई लागू औषध दुव्र्यसनबाट हुने असरहरूबारे जानकारी गराएका छन् । गुल्मपती बस्नेतका अनुसार पछिल्लो समय लागू औषध दुव्र्यसनी बढ्दो क्रममा रहेकाले विद्यालयमा पुगी विद्यार्थीहरूलाई त्यसको असरसँगै कानुनबारे जानकारी गराउन अभियान थालिएको हो ।
अभियान अन्तरगत क्रमशः सीमा क्षेत्रका अन्य मुख्य विद्यालयहरूमा कक्षा सञ्चालन गरिने उनले बताए । कक्षा सञ्चालन गरेपछि लागू औषध दुव्र्यसनी न्यूनीकरणमा सहयोग मिल्ने गुल्म पती बस्नेतले बताए ।
पछिल्लो समय दक्षिणी सीमाका बेलडाडी, बेलौरी र पुर्नवासका विभिन्न स्थानबाट लागू औषध सहित पक्राउ गरिनेक्रम बढ्दै गएको छ । कञ्चनपुरको दक्षिणी सीमा क्षेत्रमा लागू औषध दुव्र्यसनीको भयावह अवस्था छ
सीमाका भारतीय बजार पलिया, सम्पुर्णानगर, खजुरिया, टिल्ला नम्बर ४, कम्बोजनगर र टाटरगन्जबाट लागू औषध भित्रिने गरेको छ । भारतीय बजार मै पुगेर लागू औषध ल्याई सीमा क्षेत्रबाट अधिकांश युवा, युवतीहरूलाई प्रहरीेले पक्राउ गर्ने गरेको छ ।
