बैशाख ०३ धनगढी । कैलालीको खक्रौलास्थित सशस्त्र प्रहरी गुल्मभित्र प्रवेश गरेर सशस्त्र प्रहरी नायब उपरीक्षक (डीएसपी) प्रदीप पौडेलसहितलाई आक्रमण गरेको घटनामा संलग्न एक जनालाई अदालतले कारागार चलान गर्न आदेश दिएको छ ।
जिल्ला अदालत कैलालीले बिहीबार थुनछेक बहस पछि टीकापुर नगरपालिका वडा नम्बर–९ का ४० वर्षीय रामबहादुर साउदलाई पुर्पक्षका लागि कारागार चलान गर्न आदेश दिएको हो । अदालतको आदेश लगत्तै उनलाई सोही दिन कारागार पठाइएको जिल्ला प्रहरी कार्यालय कैलालीले जानकारी गराएको छ ।
जिल्ला प्रहरी कार्यालयका प्रवक्ता डीएसपी योगेन्द्र तिमिल्सिनाले डीएसपी पौडेलले साउद सहितका व्यक्तिविरुद्ध अपराधिक उपद्रव मुद्दा दर्ता गराएको जानकारी गराउदै उक्त घटनामा साउद सहित अन्य पाँच जनाविरुद्ध किटानी जाहेरी लर्ता भएको बताए ।
हाल फरार रहेका टीकापुरकै नयन साउद, सर्पराज साउद, सुरेश खड्का, रमेश खड्का तथा भारतको लखिमपुरखिरी निवासी रशिद आलिखानको खोजी भइरहेको उनले जानकारी गराए ।
घटनाको पृष्ठभूमि हेर्दा सशस्त्र प्रहरीले जिएसटी बिल र भारतीय भन्सार पास भएका टीकापुरका व्यवसायीका सामान जफत गरेपछि विवाद उत्पन्न भएको थियो ।
सोही विषयमा आपत्ति जनाउँदै टीकापुर उद्योग वाणिज्य संघको टोली छलफलका लागि गुल्म पुगेका बेला विवाद चर्किँदै डीएसपी सहितका सुरक्षाकर्मीमाथि आक्रमण गरिएको थियो ।
घटना पछि सशस्त्र प्रहरीले बिल–बिजक परीक्षण गर्दा कागजात सही भेटिए पछि उद्योग वाणिज्य संघमार्फत सम्बन्धित व्यवसायीलाई सामान फिर्ता गरिएको थियो । घटनाका क्रममा ड्युटीमा खटिएका डीएसपी सहितका सशस्त्र प्रहरी कर्मचारीलाई मुख्यालय तानेर छानबिन प्रक्रिया पनि अघि बढाइएको छ ।
