बैशाख ०३ धनगढी । नेपाल यातायात व्यावसायी राष्ट्रिय महासंघले सवारी साधनको भाडा फेरि समायोजन गरिदिन सरकारसँग माग गरेको छ । महासंघका महासचिव डेकनाथ गौतमले बिहीबार विज्ञप्ति जारी गर्दे पछिल्लो पटक भाडा समायोजन पछि दुई पटक इन्धनमा मूल्यवृद्धि भएकाले फेरि भाडा समायोजन गरिदिन वा मूल्यवृद्धि फिर्ता लिन माग गरेका हुन् ।
मध्यपूर्वको द्वन्द्वका कारण नेपाल आयल नियमले पटक–पटक डिजेल र पेट्रोलमा मूल्य वृद्धि गरिरहेको विज्ञप्तिमा उल्लेख गरिएको छ । जसले सार्वजनिक यातायात क्षेत्रमा सञ्चालन हुने यात्रुवाहक सवारी साधन र मालवाहक सवारी साधन सञ्चालनमा कठिन अवस्था सिर्जना भएको महासचिव गौतमले बताएका छन् ।
पछिल्लो पटक चैत २७ गते र वैशाख २ गते इन्धनमा वृद्धि भएको बताउदै उनले‘सरकारले २०६५ साल देखि लागु गरेको वैज्ञानिक विधि अनुरूप स्वचालित प्रणालीबाट पाँच प्रतिशत पेट्रोलियम पदार्थको मूल्यवृद्धि हुँदा हुने भाडा समायोजन गरिदिन वा मूल्य वृद्धि फिर्ता लिन विज्ञप्ति मार्फत माग गरिएको बताए ।
त्यसैगरी विषम परिस्थितिको मूल्यांकन गर्दै देशभरी सेवा सञ्चालन गर्ने महासंघ सदस्यहरूलाई पेट्रोलियम पदार्थको खपत कम गर्न र सेवा सञ्चालन गर्दा हुने घाटालाई न्यूनीकरण गर्न पनि विज्ञप्ति मार्फत स्मरण गराइएको छ । नेपाल सरकारको स्वामित्व रहेको नेपाल आयल निगमबाट पटक–पटक मूल्यवृद्धिको सट्टा वैकल्पिक व्यवस्था मिलाउन प्रेस विज्ञप्ति मार्फत माग गरिएको छ ।
