बैशाख ०३ डोटी । डोटीको विपी नगर र बाजुराको कोल्टीमा इलाका प्रशासन कार्यालय स्थापना भएसँगै स्थानीय नागरिकले घरदैलोमै छिटो,छरितो र सहज रुपमा सरकारी सेवा पाउने भएका छन् । दुर्गम भेगका बासिन्दालाई नागरिकता, जग्गा लगायतका कामका लागि सदरमुकाम धाउनुपर्ने बाध्यता हट्नुकासाथै स्थानीय नागरिकले घरदैलोमै छिटो,छरितो र सहज रुपमा सरकारी सेवा पाउने भएका हुन ।
डोटीको बडिकेदार गाउँपालिका वडा नम्बर–१ स्थित बि.पी. नगरमा स्थापना गरिएको इलाका प्रशासन कार्यालयको गृह मन्त्रालयका प्रवक्ता सहसचिव आनन्द काफ्लेले उद्घाटन गरेका छन् । उद्घाटनसँगै स्थानीय सोबिता बोहरालाई नागरिकता प्रमाणपत्र प्रदान गर्दै सेवा शुभारम्भ गरिएको थियो । डोटी जिल्लामा पहिलो पटक इलाका प्रशासन कार्यालय मार्फत सेवा सुरु भएको हो ।
कार्यालयबाट जोरायल र बडिकेदार गाउँपालिकाका सम्पूर्ण तथा बोगटान फुड्सिल गाउँपालिका वडा नम्बर–१, २ र ३ गरी ४२ हजार भन्दा बढी स्थानीय बासिन्दा प्रत्यक्ष लाभान्वित हुने भएका छन । उद्घाटन कार्यक्रममा सहसचिव काफ्लेले स्थानीय नागरिकलाई छिटो र सहज रुपमा सेवा दिने उद्देश्यले इलाका प्रशासन कार्यालय स्थापना गरिएको बताए ।
त्यसैगरी, बाजुराको पूर्वी उत्तरी क्षेत्र बुढीनन्दा नगरपालिका वडा नम्बर–२ को कोल्टीमा पनि इलाका प्रशासन कार्यालय स्थापना गरिएको छ । गृह मन्त्रालयका सहसचिव कालिप्रसाद पराजुलीले कार्यालयको उद्घाटन गरेको जिल्ला प्रशासन कार्यालय बाजुराले जनाएको छ । कोल्टीमा इलाका प्रशासन कार्यालय स्थापना भएपछि हिमाली, जगन्नाथ, स्वामीकार्तिक खापर गाउँपालिका तथा बुढीनन्दा नगरपालिकाका स्थानीयलाई नागरिकता, जग्गा लगायतका सरकारी कामकाज गर्न सहज भएको छ ।
यसअघि स्थानीय बासिन्दाले सदरमुकाम मार्तडी पुग्न एक हजार पाँच सय रुपैयाँ भाडा तिर्नुका साथै बसोबास र खानपानमा २० देखि २५ हजार रुपैयाँसम्म खर्च गनु पर्र्ने बाध्यता रहेको थियो । दुर्गम भेगका धेरै जसो स्थानीयले टाढाको दूरी र खर्चका कारण समयमै नागरिकता तथा जग्गा सम्बन्धी सेवा लिन नसक्ने अवस्था रहेको थियो । लामो समय देखि स्थानीय जनप्रतिनिधि, नागरिक समाज र बुद्धिजीवीले कोल्टीमा इलाका प्रशासन कार्यालयको माग गर्दै आएका थिए ।
सोही माग अनुसार गृह मन्त्रालयको स्वीकृति पछि कार्यालय स्थापना गरिएको हो । बाजुराका प्रमुख जिल्ला अधिकारी डोरेन्द्र निरौलाले कोल्टीमा इलाका प्रशासन कार्यालयसँगै मालपोत र नापी सेवा केन्द्र पनि संयुक्त रूपमा सञ्चालनमा ल्याइएको बताए । सीमित जनशक्तिबाट भए पनि नियमित सेवा प्रवाह सुरु गरिएको उनले जानकारी गराए । इलाका प्रशासन कार्यालय स्थापना भएसँगै डोटी र बाजुराका दुर्गम क्षेत्रका स्थानीयले सरकारी सेवा लिन सहज हुने भएको छ ।
