चैत्र ०९ कञ्चापुर । कञ्चनपुरको बेलौरी नगरपालिका स्थित श्री सिद्धकेदारनाथ आधारभूत विद्यालयले प्रविधि, अनुशासन र व्यवस्थापन मार्फत आफूलाई नमुनाका रूपमा स्थापित गरेको छ ।
बेलौरी नगरपालिका वडा नम्बर–९ खजुवा वस्तीमा रहेको श्री सिद्धकेदारनाथ आधारभूत विद्यालयले प्रविधि, अनुशासन र व्यवस्थापन मार्फत आफूलाई नमुनाका रूपमा स्थापित गरेको हो । विद्यालय पालिकाभरी उत्कृष्ट मध्ये एक भएर चिनिन थालेको छ । विद्यालयमा सिसिटिभी क्यामेरा र अडियो प्रणाली जडान गरी अफिसबाटै कक्षाकोठाको प्रत्यक्ष निगरानी गर्ने व्यवस्था गरिएको छ ।
विद्यालयका प्रधानाध्यापक परमानन्द जोशीले २०७५ सालमा आफुले जिम्मेवारी सम्हाल्दा विद्यालयमा ९१ जना विद्यार्थी रहेको बताउदै हाल उक्त संख्या बढेर १ सय ८२ पुगेको बताए । “पहिले सिसिटिभी मात्र भएको बताउदै उनले अहिले अडियो पनि जोडिएकाले कक्षाकोठाको गतिविधि सजिलै हेर्न र आवश्यक निर्देशन दिन सकिने भम्एको बताए ।
विद्यालयको अर्को विशेषता अनुशासित वातावरण भएको बताईएको छ । बिहान १० बज्नु भन्दा अगावै विद्यार्थीहरू कक्षामा उपस्थित हुनुकासाथै घण्टीसँगै पिटी सञ्चालन गरिने र ई–हाजिरी लिने व्यवस्था गरिएको विद्यालय प्रशासनले जनाएको छ ।
पिटीपछि विद्यार्थीहरू पुनः व्यवस्थित रूपमा कक्षामा फकिने र शुक्रबार पनि नियमित पढाइ हुने गरेको विद्यालय प्रशासनले जनाएको छ । विद्यालयका अनुसार नर्सरी देखि कक्षा ३ सम्म अङ्ग्रेजी माध्यममा पढाइ भइरहेको छ भने कक्षा ५ सम्म अङ्ग्रेजी माध्यम विस्तार गर्ने तयारी गरिएको छ ।
निःशुल्क शिक्षाको व्यवस्था भए पनि निजी प्रकाशनका पुस्तक किन्नुपर्ने बाध्यताले अभिभावकलाई आर्थिक भार परेको विद्यालय प्रशासनले जनाएको छ । विद्यालयमा १२ जना शिक्षक कार्यरत भए पनि स्थायी दरबन्दीमा मात्र १ जना शिक्षक रहेका छन् । बाँकी शिक्षक राहत, अनुदान र निजी स्रोतबाट रहेका छन् ।
आर्थिक अभावका कारण केही शिक्षकको तलब समेत बाँकी रहेको बताईएको छ । विद्यालयको आम्दानी मुख्यतः आमबारी र माछा पोखरीबाट हुने गरेको भए पनि पर्याप्त नहुँदा दैनिक सञ्चालनमा कठिनाइ भइरहेको प्रधानाध्यापक जोशीले बताए ।
आगामी ५ वर्ष भित्र विद्यार्थी संख्या ५ सय पु¥याउने लक्ष्य लिएको बताउदै उनले यसका लागि भौतिक पूर्वाधार, शिक्षक दरबन्दी र शैक्षिक सामग्रीमा थप सहयोग आवश्यक भएको बताए ।
बेलौरी नगरपालिकाका शिक्षा शाखा प्रमुख अमित प्रसाद भट्टले विद्यालयका गतिविधि अन्य सामुदायिक विद्यालयका लागि प्रेरणादायी भएको बताए । पालिकाले पूर्वाधार र शैक्षिक सामग्रीमा सहयोग गर्दै आएको बताउदै उनले गत वर्ष मात्रै विद्यालयमा ४ कोठे भवन निर्माण गरिएको जानकारी गराए ।
