फागुन १८ धनगढी । कैलाली क्षेत्र नम्बर ५ बाट स्वतन्त्र उम्मेदवारी दिएका ईश्वरी विष्टले राष्ट्रिय स्वतन्त्र पार्टी (रास्वपा) का उम्मेदवार आनन्द चन्दलाई समर्थन गरेका छन् । यस अघि असन्तुष्टि जनाउँदै स्वतन्त्र उम्मेदवारी दिएका विष्टले चन्दलाई समर्थन गरेका हुन ।
सोमबार धनगढी स्थित रास्वपाको सम्पर्क कार्यलयमा उम्मेदवार चन्दले विष्टलाई स्वागत गरेका छन । रास्वपाका उम्मेदवार चन्दले स्वतन्त्र उम्मेदवारी विष्टको समर्थन संगै जित सुनिश्चित भएको बताएका छन । रास्वमा प्रवेश गर्दै विष्टले देश परिवर्तनको संघारमा उभिएकाले व्यक्तिगत चाहना भन्दा माथि उठेर रास्वपाका उम्मेदवार चन्दलाई समर्थन गरेको बताए ।
उनले सुशासन र पारदर्शिताका लागि परिवर्तनको पक्षमा सबैले उभिनु पर्ने बताए । उनले व्यक्तिगत चाहना भन्दा माथि उठेर रास्वपालाई समर्थन गरेको बताए । सुशासन र पारदर्शिताका लागि परिवर्तनको पक्षमा उभिन कैलाली–५ का मतदातालाई उनले अनुरोध गरेका छन ।
विष्टलाई पार्टीमा स्वागत गर्दै समानुपातिक उम्मेदवार समेत रहेकी रास्वपा प्रदेश सह–महामन्त्री करिष्मा कठरियाले स्वतन्त्र उम्मेदवारी दिएका विष्टले उम्मेदवारी निष्कृय पारेर रास्वपामै फर्किनुलाई शुभ संकेतका रुपमा लिएको बताइन् ।
उनले रास्वपाले कैलालीका पाँच वटै क्षेत्रमा चुनाव जित्ने दाबी गरेकी छिन् । विष्ट यस अघि राष्ट्रिय स्वतन्त्र पार्टीका कैलाली क्षेत्र नम्बर ५ का सभापति थिए । उनी २०७९ सालको प्रतिनिधि सभा निर्वाचनमा कैलाली–५ बाट उम्मेदवार बनेर सुदूरपश्चिम प्रदेशमै रास्वपाको दोस्रो बढी मत प्राप्त गर्ने उम्मेदवार बनेका थिए ।
