माघ १६ धनगढी । नेपाली कम्युनिष्ट पार्टीका नेता एवं कैलाली क्षेत्र नम्बर ५ का उम्मेदवार प्रेमबहादुर आलले धनगढी विमानस्थललाई क्षेत्रीय विमानस्थल बनाएरै छाड्ने प्रतिबद्धता जाहेर गरेका छन । शुक्रबार धनगढी उपमहानगरपालिका वडा नम्बर– १ को निर्वाचन परिचालन सचिवालय उद्घाटन गर्दै उनले यस्तो बताएका हुन् ।
क्षेत्रीय विमानस्थल बन्यो भने कुनै समस्या पर्दा अन्य देशमा सिधै उडान भर्न सकिने बताउदै उनले यसले पर्यटन प्रवर्धनमा पनि टेवा पु¥याउने बताए । विदेशी पर्यटक सिधै आउन सक्ने बताउदै उनले विमानस्थललाई क्षेत्रीय विमानस्थल बनाउनु आजको आवश्यकता भएको बताए ।
त्यसैगरी धनगढीस्थित सेती प्रादेशिक अस्पतालको स्तरोन्नतिमा जोड दिने बताउदै उनले सेती प्रादेशिक अस्पतालको स्तरोन्नति अझै हुन नसकेको बताए । सेती प्रादेशिक अस्पताललाई अत्याधुनिक बनाउन स्तरोन्नतिका लागि लाग्ने उनले बताए ।
पूर्वमन्त्री समेत रहेका आलेले गेटा मेडिकल कलेजलाई कम्तीमा ५ सय बेडको स्वीकृति गराएर एमबीबीएस पढाइ हुने गरि अगाडि बढाउने प्रतिवद्धता जाहेर गरेका छन । बिगतमा राम्रो काम गरेकै कारण डोटीबाट लगातार तीन पटक निर्वाचन जितेको बताउँदै उनले यस पटक कैलाली ५ का जनताको साथ पाउने बताए ।
बिगतमा आफूले बोलेका कुराहरु पूरा गर्दै आएको बताउँदै उनले बोलेका कुरा गर्छु कि गर्दैन भनेर बुझेर चुनावमा लाग्न आग्रह गरे । आलेले कैलाली क्षेत्र नम्बर ५ मा आफ्ना चुनावी गतिविधिलाई तीब्र बनाउदै लगेका छन् । सबै वडामा निर्वाचन परिचालन सचिवालय स्थापना तथा तयारी बैठक लगभग सम्पन्न गरिसकेका छन् ।
डोटीबाट पटक पटक निर्वाचन जितेका आले आसन्न फागुन २१ गतेको प्रतिनिधिसभा सदस्य निर्वाचनका लागि कैलाली झरेका हुन । आलेले डोटीबाट २०७० सालको संविधान सभा, ०७४ सालको प्रतिनिधि सभा सदस्य र २०७९ सालको प्रतिनिधिसभा सदस्य निर्वाचनमा जित हासिल गरेका थिए ।
