माघ १४ बझाङ । अख्तियार दुरुपयोग अनुसन्धान आयोगले बझाङको वित्थडचिर गाउँपालिका वडा नम्बर–९ स्थित श्री सुनकुडा माध्यमिक विद्यालयको भवन निर्माणमा अनियमितता गरेको आरोपमा तत्कालीन प्रधानाध्यापक सहित ५ जनाविरुद्ध भ्रष्टाचार मुद्दा दायर गरेको छ ।
विद्यालयको ३ तले १२ कोठे नमुना भवन निर्माण गर्दा वास्तविक काम भन्दा बढी मूल्याङ्कन गरी सरकारी रकम हिनामिना गरेको भन्दै आयोगले बुधबार विशेष अदालत काठमाडौंमा ५ जनाविरुद्ध भ्रष्टाचार मुद्दा दायर गरेको हो । आयोगका अनुसार विद्यालय व्यवस्थापन समिति र निर्माण पक्षको मिलेमतोमा फिल्डमा भएको काम भन्दा बढीको नापी किताब र बिल तयार पारी भुक्तानी लिएको पाइएको छ ।
नभएको कामलाई पनि भएको भनि देखाइएको र सामाजिक सुरक्षा कर, बहाल कर लगायतका शीर्षकमा आपूर्तिकर्ताबाट कट्टा गर्नुपर्ने रकम समेत विद्यालयको आन्तरिक कोषबाट तिरेर राज्यलाई नोक्सानी पु¥याएको अनुसन्धानबाट खुलेको अख्तियारले जनाएको छ ।
विद्यालय व्यवस्थापन समितिका तत्कालीन अध्यक्ष रमेश बहादुर अधिकारी, प्रधानाध्यापक धन बहादुर विष्ट र लेखापाल हर्क बहादुर विष्ट विरुद्ध मुद्दा दायर गरिएको हो । उनीहरू विरुद्ध २६ लाख ५४ हजार ६ सय ८३ रुपैयाँ बिगो कायम गरिएको छ ।
त्यसैगरी गाउँपालिकाका तत्कालीन निमित्त प्रमुख प्रशासकीय अधिकृत रमेश बहादुर विष्ट र सव–इन्जिनियर किरण भण्डारी विरुद्ध २० लाख १ हजार ७ सय ७९ रुपैयाँ बिगो दाबी गर्दै कैद र जरिवानाको माग गरिएको आयोगका प्रवक्ता सुरेश न्यौपानेले जानकारी गराएका छन ।
