माघ ०७ बैतडी । आगामी फागुन २१ गते हुने प्रतिनिधिसभा सदस्य निर्वाचनलाई सुरक्षित, स्वच्छ र शान्तिपूर्ण रूपमा सम्पन्न गराउन जिल्ला प्रशासन कार्यालय बैतडीले यक्तिगत नाममा इजाजत प्राप्त हातहतियार अनिवार्य रूपमा बुझाउन निर्देशन दिएको छ ।
व्यक्तिका नाममा दर्ता रहेका हातहतियार तथा त्यसमा प्रयोग हुने गोली यही माघ २० गतेभित्र जिल्ला प्रहरी कार्यालय वा नजिकको प्रहरी चौकीमा बुझाउन जिल्ला प्रशासन कार्यालय बैतडीले निर्देशन दिएको हो ।
सहायक प्रमुख जिल्ला अधिकारी कृष्ण थापाले सुरक्षा व्यवस्थामा कडाइ गर्न निर्वाचनको निष्पक्षता र मर्यादा कायम राख्न हातहतियार अनिवार्य रूपमा बुझाउन निर्देशन दिएको बताए ।
निर्देशन अनुसार तोकिएको समय भित्र इजाजत प्राप्त हातहतियार नबुझाए प्रचलित कानुन बमोजिम कारबाही हुने उनले जानकारी गराए । बुझाइएका हातहतियार निर्वाचन सम्पन्न भएपछि चैत २० गतेपछि सम्बन्धित धनीलाई फिर्ता गरिने उनले बताए ।
त्यसैगरी जिल्ला निर्वाचन कार्यालय बैतडीले पनि निर्वाचनको तयारी तीव्र पारेको जनाएको छ । एक निर्वाचन क्षेत्र रहेको बैतडीमा १२ जनाको उम्मेदवारी दर्ता भइसकेको छ ।
जिल्लामा २ सय १४ मतदान केन्द्र र १ सय २९ मतदानस्थल कायम गरिएका छन् भने एक लाख ५६ हजार ३ सय ७२ मतदाता रहेको जिल्ला निर्वाचन कार्यालयका प्रमुख खगेन्द्र भारतीले जानकारी गराए ।
