माघ ०२ धनगढी । कैलाली निर्वाचन क्षेत्र नंम्बर ४ मा निर्वाचन अधिकृतको कार्यालय स्थापना गरिएको छ । शुक्रबार कैलालीको गोदावरी नगरपालिका वडा नम्बर–१ स्थित कृषि तथा पशुपंक्षी सेवा केन्द्रमा निर्वाचन अधिकृतको कार्यालय स्थापना गरिएको हो ।
कार्यालयको निर्वाचन अधिकृत हरि प्रसाद आचार्यले उद्घाटन गरेका छन । कार्यालयको उदघाटन गर्दे सहायक निर्वाचन अधिकृत गिरीराज भण्डारीले कैलाली निर्वाचन क्षेत्र नम्बर ४ मा प्रतिनिधि सभा निर्वाचनलाई लक्षित गरी निर्वाचन अधिकृतको कार्यालय स्थापना गरिएको बताए ।
आसन्न फागुन २१ गते हुने प्रतिनिधि सभा सदस्य निर्वाचन लगायतका सम्पूर्ण कार्यक्रमका लागि कार्यालय स्थापना गरएकोे उनले बताए ।
उक्त कार्यालयबाट गोदावरी नगरपालिका, गौरीगंगा नगरपालिका र चुरे गाउँपालिकाका सबै वडा तथा मोहन्याल गाउँपालिकाको वडा नंम्बर ५ का सम्पूर्ण मतदान स्थल, मतदान केन्द्र तथा निर्वाचनका सम्पूर्ण कामकारबाहीहरु गरिने उनले बताए । ‘कार्यालयबाट मतदान केन्द्र तथा स्थलहरुमा कर्मचारी खटनपटन गर्ने, मतदान सञ्चालन गर्ने र मतमेटीका संकलन गरी मत घोषणा गर्ने लगायतका काम गरिने उनले बताए ।
कैलाली निर्वाचन क्षेत्र नंम्बर ४ मा यसपटक १ लाख १५ हजार १ सय ४३ मतदाता रहेको सहायक निर्वाचन अधिकृत भण्डारीले बताए । निर्वाचन क्षेत्रमा ५७ वटा मतदान स्थल रहेको जानकारी गराउदै उनले १ सय ३६ वटा मतदान केन्द्र रहेको भण्डारीले बताए ।
सहायक निर्वाचन अधिकृत भण्डारीले उक्त मतदान स्थलहरु मध्ये गोदावरी नगरपालिकामा २४, गौरीगंगा नगरपालिकामा १७, चुरे गाउँपालिकामा १४ र मोहन्याल गाउँपालिकामा २ वटा रहेको जानकारी गराए । त्यसैगरी १ सय ३६ निर्वाचन केन्द्र मध्ये गोदावरीमा ६९, गौरीगंगामा ४५, चुरेमा २० र मोहन्यालमा २ वटा रहेको भण्डारीले जानकारी गराए ।
