पौष २७ धनगढी । सरकारले ‘निर्वाचन प्रहरी’ भर्नाका लागि आवेदन खुला गरेपछि सुदूरपश्चिम प्रदेशको धनगढीमा आवेदन दिनेको घुईचो लागेको छ । जिल्ला प्रहरी कार्यालय कैलालीमा निर्वाचन प्रहरीमा भर्ना हुन आवेदन दिने युवायुवतीहरुको घुईचो लागेको हो ।
आसन्न प्रतिनिधिसभा निर्वाचनलाई लक्षित गर्दै सुदूरपश्चिम प्रदेशमा १५ हजार १ सय ७९ जना निर्वाचन प्रहरी भर्ना गरिने भएको छ । प्रदेशमा सबैभन्दा बढी निर्वाचन प्रहरी कैलालीमा र सबैभन्दा कम दार्चुलामा परिचालन हुने भएका छन् । कैलाली जिल्लामा चार हजार ९८ जना निर्वाचन प्रहरीको माग गरिएको छ भने दार्चुलामा ९ सय ३० जना माग गरिएको छ ।
त्यसैगरी कञ्चनपुरमा दुई हजार ३ सय २७, अछाममा एक हजार ६ सय ४२, बझाङमा एक हजार ५ सय ८०, बैतडीमा एक हजार ३ सय ७५, डोटीमा एक हजार १ सय ३६, बाजुरामा एक हजार ६० र डडेल्धुरामा एक हजार ४० जना निर्वाचन प्रहरी भर्ना गरिने भएको छ ।
नेपाल प्रहरी तथा सशस्त्र प्रहरी बल नेपालको कार्यविधि २०८२ अनुसार निर्वाचन प्रहरी भर्ना प्रक्रिया अघि बढाइएको हो । सुदूरपश्चिम प्रदेशमा प्रतिनिधिसभा तर्फ १६ वटा निर्वाचन क्षेत्र रहेका छन । निर्वाचन सम्पन्न गर्न प्रदेशमा एक हजार १ सय ७६ मतदानस्थल कायम गरिएको छ ।
