पौष २३ धनगढी । सुदूरपश्चिम प्रदेशमा राष्ट्रिय सभा सदस्यको दुई वटा रिक्त पदका लागि माघ ११ गते हुने निर्बाचनमा काँग्रेस–एमालेको गठबन्धन भएको छ भने नेकपाले एकल उम्मेदवारीे दिएको छ । एक जना महिला र एक जना खुल्ला सदस्यका लागि हुने निर्वाचनमा काँग्रेस र एमालेले गरेको चुनावी गठबन्धन गरेको हो भने नेकपाले एकल उम्मेदवारीे दिएको हो । केन्द्रमा राष्ट्रिय सभाका लागि काँग्रेस, एमाले, नेकपा र जसपाको गठवन्धन हुने सहमति भए पनि सुदूरपश्चिम प्रदेशमा भने नेकपाले छुट्टै उम्मेदवारी दर्ता गरेको छ ।
काँग्रेस र एमालेसँग सहमति नजुटे पछि नेपाली कम्युनिस्ट पार्टी (नेकपा)ले राष्ट्रिय सभा निर्वाचनमा एकल उम्मेदवारी दिएको हो । सुदूरपश्चिम प्रदेशमा रिक्त रहेको एक जना पुरुष र एक जना महिला सिटमा नेकपाले पनि महिलातर्फ रोजी बस्नेत सुनार र पुरुषतर्फ टिकाराम जैशीले उम्मेदवारी दिएका हुन । जैसी माओवादी पृष्ठभूमिका नेता हुन् भने बस्नेत पूर्व एकीकृत समाजवादीकी हुन् । गठबन्धनबाट भने काँग्रेसले खम्ब खाती र एमालेले लिला भण्डारीको उम्मेदवारी दर्ता गरेको छ ।
खाती पूर्वमहान्यायाधि वक्ता हुन् भने माओवादी पृष्ठभूमिकी भण्डारी पूर्वराज्य मन्त्री हुन् । केन्द्रमा चार वटा दलबीच हुने भनिएको गठवन्धन सुदूरपश्चिम प्रदेशमा उम्मेदवारी दर्ता गर्दा नभएको देखिएको छ । एमालेकी शारदादेवी भट्ट र नेकपाका तारामान स्वाँरको आगामी फागुन २० गते पदावधि सकिँदैछ । निर्वाचन आयोगले प्रदेशसभा सदस्यको ५३ र स्थानीय तहका प्रमुख र उपप्रमुखको समान १९ मतभार तोकेको छ ।
यस आधारमा सुदूरपश्चिम प्रदेशमा कुल ६ हजार १ सय ५३ मतभार रहेको छ । सुदूरपश्चिममा कांग्रेस सबैभन्दा बलियो देखिएको छ । १८ प्रदेशसभा सदस्य र ८६ जना स्थानीय तहका प्रमुख र उपप्रमुख रहेको कांग्रेससँग एक्लै २ हजार ५ सय ८८ मतभार छ । नेकपाको मतभार १ हजार ८ सय ६९ छ भने एमालेसँग १ हजार ५ सय ३३ मतभार छ । राष्ट्रिय स्वतन्त्र पार्टी र राप्रपाको समान ५३ र ५३ मतभार छ भने स्वतन्त्रतर्फ ३८ मतभार छ ।
