पौष १८ कञ्चनपुर । कृषि उत्पादन र उत्पादकत्व वृद्धि गर्ने उद्देश्यले कृषि ज्ञान केन्द्र महेन्द्रनगरले कञ्चनपुरका नौवटा पालिकामा कृषि पकेट क्षेत्र निर्धारण गरेको छ । पकेट क्षेत्र मार्फत निश्चित भौगोलिक क्षेत्रमा विशेष बाली तथा उत्पादनलाई प्राथमिकता दिई आधुनिक कृषि प्रविधि, सिँचाइ सुविधा, उन्नत बीउबिजन र प्राविधिक सहयोग उपलब्ध गराउने गरी कृषि ज्ञान केन्द्रले कञ्चनपुरका नौवटा पालिकामा कृषि पकेट क्षेत्र निर्धारण गरेको हो ।
कृषि ज्ञान केन्द्रका सूचना अधिकारी धर्म साउँदले कृषि पकेट क्षेत्र निर्धारण गरेको जानकारी गराउदै किसानलाई अनुदान तथा परम्परागत खेती प्रणालीलाई व्यावसायिक र प्रतिस्पर्धी बनाउन सहयोग पुग्ने बताए । ’चालु आर्थिक वर्षमा कञ्चनपुरमा स्थानीय तह कृषि विशेष पकेट क्षेत्रका लागि प्रत्येक पालिकामा ४० लाख बजेट विनियोजन गरिएको सूचना अधिकारी साउँदले बताए ।
यसले उत्पादन र उत्पादकत्वमा वृद्धि हुने अपेक्षा गरेको बताउदै उनले केन्द्रले भीमदत्त नगरपालिकालाई केरा पकेट क्षेत्र निर्धारण गरेकोे बताए । बेदकोट नगरपालिका, शुक्लाफाँटा नगरपालिका, पूर्नवास नगरपालिका र दोधारा चाँदनी नगरपालिकालाई आलु पकेट क्षेत्र निर्धारण गरिएको जानकारी गराउदै साउँदले कृष्णपुर नगरपालिकालाई तरकारी पकेट क्षेत्र निर्धारण गरिएको बताए ।
त्यसैगरी लालझाँडी गाउँपालिका दलन पकेट क्षेत्र, बेलौरी नगरपालिका तोरी पकेट क्षेत्र र बेल्डाँडी गाउँपालिका आलु पकेट क्षेत्र निर्धारण गरिएको उनले बताए । ’तीनवर्षे कार्यक्रम अन्तर्गत यो कार्यक्रम कार्यान्वयनको चरणमा रहेको बताउदै सूचना अधिकारी साउँदले आलु पकेट क्षेत्रका किसानका लागि कोल्डस्टोरको समेत व्यवस्था गरिएको बताए । आलु पकेट क्षेत्र रहेको पुनर्वासमा दुईवटा कोल्डस्टोर रहेको उनले बताए ।
त्यसैगरी बेदकोट नगरपालिका, दोधारा चाँदनी नगरपालिका र बेल्डाँडी गाउँपालिकामा कोल्डस्टोर सञ्चालनमा रहेका छन् । पकेट क्षेत्र प्रणालीले लागत घटाई उत्पादन बढाउन र आय आर्जनमा वृद्धि गर्न सहयोग पुग्ने किसानले अपेक्षा गरेका छन । कार्यक्रमले व्यावसायिक रूपमा कृषिमा लागेका किसानलाई प्रोत्साहन गरेको स्थानीइ किसान खुसी रानाले बताए । केन्द्रबाट पाउने अनुदान र प्राविधिक सहयोगले सहज हुनाका साथै राहत पुगेको उनले बताए ।
एक दशकदेखि तरकारीखेती गर्दै आएका रानाले पकेट क्षेत्र विशेष कार्यक्रमले प्रविधिमा पहुँच बढ्ने र उत्पादनले सुनिश्चित बजार पाउनेमा ढुक्क भएको बताए । भेटेरिनरी अस्पताल तथा पशु सेवा विज्ञ केन्द्र कञ्चनपुरबाट चालु आर्थिक वर्षमा पालिका विशेष उत्पादन कार्यक्रमका लागि पकेट क्षेत्र निर्धारण गरिएको वरिष्ठ पशु विकास अधिकृत श्यामसिंह खड्काले जानकारी दिए । उनका अनुसार सातवटा पालिकालाई भैँसीपालन र दुईवटा पालिकालाई बाख्रापालन विशेष कार्यक्रमका रूपमा तोकिएको छ ।
कृष्णपुर, शुक्लाफाँटा, बेल्डाँडी, दोधारा चाँदनी, भीमदत्त, बेदकोट र पुनर्वास नगरपालिकालाई भैँसीपालन पकेट क्षेत्र निर्धारण गरिएको जानकारी गराउदै खड्काले लालझाँडी गाउँपालिका र बेलौरी नगरपालिकामा बाख्रा पकेट क्षेत्रका लागि बजेट विनियोजन गरिएको बताए ।
वरिष्ठ पशु विकास अधिकृत खड्काले’पुनर्वास र भीमदत्त नगरपालिकामा क्रमश ६० र ५० लाख बजेट आएको बताउदैे अन्य पालिकाका लागी ४० लाख बजेट रहेको बताए । उनले सम्भावना देखिएका पशुपन्छीको उत्पादनका क्षेत्रलाई विशेष क्षेत्रका रूपमा निर्धारण गरी व्यावसायिक कृषिको विकास गर्ने लक्ष्य अनुसार कार्यक्रम सञ्चालन गरिएको बताए ।
