मंसिर १६ धनगढी । गृहमन्त्री ओमप्रकाश अर्यालले तोकिएकै मितिमा निष्पक्ष रुपमा निर्वाचन हुने बताएका छन् । मङ्गलवार धनगढीमा आयोजित सुदूरपश्चिम प्रदेशस्तरीय सुरक्षा गोष्ठीलाई सम्बोधन गर्दै गृहमन्त्री अर्यालले फागुन २१ गते तोकिएकै मितिमा निष्पक्ष रुपमा निर्वाचन हुने बताएका हुन ।
गृहमन्त्री अर्यालले सरकारको मुख्य जिम्मेवारी नागरिकलाई सुरक्षा प्रदान गर्दै र सुशासन कायम गर्नु र समयमै निर्वाचन गर्नु रहेको बताएका छन् । सरकारको मुख्य जिम्मेवारी शान्ति सुरक्षा कायम गर्दै सुशासन कायम गर्नु र निर्वाचन गर्ने भएको बताउदै उनले सरकारले निष्पक्ष र भयरहित वातावरणमा शान्तिपूर्ण रुपमा चुनाव तोकिएकै समयमा गर्ने बताए । गृहमन्त्री अर्यालले निर्वाचनको वातावरण निर्माण गर्न सरकारका सबै संयन्त्र परिचालन गरिएको बताउदै राजनीतिक दललाई निर्वाध रुपमा चुनावी गतिविधि गर्ने वातावरण बनाउन सरकार सक्रिय रहेको बताए ।
गृहमन्त्री ओमप्रकाश अर्यालले देशभरका ४ हजार ५ सय ५२ जना कैदीबन्दी अझै फरार रहेको जानकारी समेत गराएका छन् । सुदूरपश्चिम प्रदेशस्तरीय सुरक्षा गोष्ठीको उद्घाटन गर्दै अर्यालले देशभरका ४ हजार ५ सय ५२ जना कैदीबन्दी अझै फरार रहेको जानकारी गराएका हुन । कुल ७ सय २७ वटा हातहतियार सरकारले फिर्ता ल्याइसकेको बताउदै गृह मन्त्री अर्यालले सरकारको मुख्य कार्यभार घोषित मितिमै भयरहित, स्वच्छ, स्वन्तन्त्र वातावरणमा निर्वाचन सम्पन्न गर्नु भएको बताए । केही थान हतियार र फरार कैदीबन्दी बाहिरै रहेको अवस्थामा निर्वाचन हुन्न कि भन्ने शंका र भ्रम नगर्न उनले आग्रह गरेका छन ।
कुशासन र बेथितिविरुद्ध जेन–जी युवाहरूले उठाएका माग र भदौ २३ र २४ को घटनापश्चात् सरकार र गृह प्रशासनले शान्ति सुरक्षा, अपराध नियन्त्रण, सुशासन, सेवा प्रवाहको प्रभाकारिता र समन्वयात्मक कार्यमा निष्ठापूर्वक कार्य गरिरहेको उनले बताए । सरकारले वार्ता, संवाद र छलफललाई प्राथमिकता दिएको बताउर्दै मन्त्री अर्यालले कसैलाई काखा र पाखा नगरीकन सबैका कुरा सुनेको बताए । सबै राजनीतिक दल, नागरिकहरूलाई मन्त्री अर्यालले देश बनाउने अभिभारा सबैको भएकाले सबैले निर्बाचन सम्पन्न गर्न लाग्नु पर्ने बताए । प्रत्येक नागरिकले देशका लागी सोच्नु पर्ने बताउदै उनले सरकारले सरोकारवालासँगको समन्वय र सहकार्यलाई थप सुदृढ बनाउने बताए ।
