मंसिर ०६ धनगढी । नवगठित नेपाली कम्युनिस्ट पार्टीमा आवद्ध भएका राष्ट्रिय राजनीतिका पाका नेता डा. भीम रावललाई नेपाली कांग्रेस (विपी)का नेता कर्णबहादुर मल्लले सुदूरपश्चिम प्रदेशको आशा जोगाएर मुलुकलाई निकास दिने गरी काम गर्न आग्रह गरेका छन ।
शुक्रबार धनगढीमा भेटवार्ता गरी सुदूरपश्चिम प्रदेशसभाका पूर्व सदस्य समेत रहेका विपी कांग्रेसका नेता मल्लले डा.रावलसँगको भेटघाटका क्रममा सुदूरपश्चिम बासीहरुको आशा जोगाएर चाँडै विद्यमान संकटबाट मुलुकलाई निकास दिन आग्रह गरेका हुन ।
नेपाली कम्युनिस्ट पार्टीमा आवद्ध भएपछि पहिलोपटक सुदूरपश्चिम भ्रमणमा निस्किएका डा. रावलसँग भेटघाट गर्न नेता कार्यकर्ताहरुको भिड लागेको छ ।
सुदूरपश्चिम प्रदेशमा वामआन्दोलनको अगुवाई गर्दै नेकपा (एमाले) को उपाध्यक्ष र मुलुकको उपप्रधानमन्त्री भएका नेता डा. रावललाई अध्यक्षमा प्रतिष्प्रर्धा गरेको प्रतिशोधमा नेकपा (एमाले)का अध्यक्ष केपी शर्मा ओलीले पार्टीबाट निस्कासन गरेपछि मातृभूमी जागरण अभियान गठन गरेर क्रियासिल रहेका थिए ।
सुदूरपश्चिम प्रदेशबाट लामो समय देखि राष्ट्रिय राजनीतिमा क्रियाशील डा. रावलले मुलुकमा विद्यमान समस्याको निकासका लागि सबै राजनीतिक दल र राष्ट्रवादी शक्तिहरू एकतावद्ध भएर अघि बढनुपर्ने बताएका छन ।
भेटघाटका क्रममा नेपाली कम्युनिस्ट पार्टीका सुदूरपश्चिम प्रदेशस्तरीय नेता कार्यकर्ताहरुको पनि उपस्थिति रहेको थियो ।
