कार्तिक २३ अछाम । अछामका ४ वटा स्थानिय तहले संयुक्त रुपमा दमकल खरिद गर्ने तयारी गरेका छन । अछामको साँफेबगर नगरपालिका, मेल्लेख गाउँपालिका, चौरपाटी गाउँपालिका र बान्नीगढी–जयगढ गाउँपालिकाले आपसी सहकार्यमा दमकल खरिद गर्ने तयारी गरेका हुन । लगातार भइरहेका भीषण आगलागीका घटनाबाट धनजनको क्षति हुन थालेपछि ४ वटा स्थानिय तहले दमकल खरिद गर्नका लागि संयुक्त पहल गरेका हुन ।
पछिल्लो समय बान्नीगढ–जयगढ गाउँपालिकाको जयगढ बजार र साँफेबगरको हाटबजारमा भएका आगलागीका घटना पछि दमकलको अभाव खड्किएको थियो । यी घटनाहरूमा करोडौंको क्षति भएको र समयमै आगो नियन्त्रण गर्न नसक्दा बजार खण्डहरमा परिणत भएका थिए ।
जिल्लामा एक मात्र दमकल सदरमुकाम मंगलसेन नगरपालिकासँग रहेको र त्यो पनि भौगोलिक विकटताका कारण समयमै घटनास्थलमा पुग्न नसक्ने समस्या रहेको छ ।
तिनै समस्यालाई मध्यनजर गरी चार वटा पालिकाका प्रमुखहरूको बैठकले संयुक्त रूपमा दमकल खरिद गर्ने निर्णय गरेको हो । साँफेबगर नगरपालिकाका नगर प्रमुख राजेन्द्रबहादुर कुँवरले हालै बसेको संयुक्त बैठकमा दमकल खरिदको आवश्यकता र सहकार्यबारे गम्भीर छलफल भएको बताए ।
सोही बैठकमा चारवटै पालिका दमकल खरिद गर्न तयार भएको उनले बताए । दमकल खरिदका लागि साँफेबगर नगरपालिका र चौरपाटी गाउँपालिकाले २०–२० लाख रुपैयाँ बजेट छुट्टाइसकेका छन् ।
त्यसैगरी मेल्लेख गाउँपालिका र बान्नीगढी–जयगढ गाउँपालिकाले पनि आवश्यक बजेट विनियोजन गरेर खरिद प्रक्रियामा सहभागी हुने प्रतिबद्धता जनाएका छन् । विगतमा साँफेबगर र जयगढमा आगलागी हुँदा स्थानीय, नेपाल प्रहरी र सशस्त्र प्रहरीले खोलाको पानी बाल्टीले बोकेर घण्टौंको प्रयास पछि मात्र आगो नियन्त्रणमा लिएका थिए ।
